კვლევის ახალი ეპოქა

ივლისში ყურადღების ცენტრში არიან მკვლევრები – ადამიანები, რომლებიც უცნობ ადგილებს მიაშურებენ, იკვლევენ წარსულსა თუ აწმყოს, ზრუნავენ უკეთეს მომავალზე. მათი დამსახურებაა, რომ National Geographic-ს 135 წელია არ გამოლევია თქვენთვის მოსათხრობი სათავგადასავლო და შემეცნებითი ამბები.  

კვლევის ახალ ეპოქაში აღარ არსებობს ბუნებრივი ბარიერები – გადაულახავი ოკეანეები და უცხო კონტინენტები; თუმცა არსებობს ისეთი ხელოვნური ბარიერები, როგორებიცაა, მაგალითად, ჩაკეტილი საზღვრები ან სოციალური უთანასწორობა. სრული ანაქრონიზმია, რომ თანამედროვე ავღანელი გოგონებისთვის სკოლის დამთავრება ოკეანის გადაცურვის ტოლფასია; შაბანა ბასიჯ-რასიხმა ეს შეძლო. ჰუმანიტარი განმანათლებელი დღეს ახალ თაობასაც უკვალავს გზას, რისთვისაც მას National Geographic-ის წლის მკვლევრის წოდება მიენიჭა. ამ ნომერში გაგაცნობთ მას და სხვა იმედისმომცემ ახალგაზრდებს; ასევე წარმოგიდგენთ უკვე გამოცდილ მკვლევრებს – მეცნიერებს, ფოტოგრაფებს, მწერლებს, ბუნების დამცველებს, რომლებიც სიყვარულით ემსახურებიან თავიანთ საქმეს, ენთუზიაზმით გვიზიარებენ მიგნებებს, გვამოგზაურებენ დროსა და სივრცეში: ინდონეზიის ლაჟვარდოვან ლაგუნებში ზვიგენების პოპულაციის გადასარჩენად, პრეისტორიული მხატვრობის ნიმუშების სანახავად ამაზონის ჯუნგლებში, არაინდუსტრიული პროვინციის გასაცნობად ჩინეთის მთებში, ადამიანის წინაპრების ცხოვრების წესის ამოსახსნელად სამხრეთ აფრიკასა თუ აქვე, დმანისში. ამ ნომერში საქართველო არაერთხელ შეგხვდებათ – ზოგჯერ სრულიად მოულოდნელ კონტექსტშიც.

სასიამოვნო მოგზაურობას გისურვებთ!