აქამდე არნახული სტოუნჰენჯი
-
-
-
-
ბმული კოპირებულია
ვერტიკალურად მდგომი პრეისტორიული ქვების ჯგუფი, სახელად სტოუნჰენჯი, დამთვალიერებლებს მუდამ აინტრიგებდა. შთამბეჭდავი მონუმენტი სოლსბერის ვაკეზე, ინგლისში, მილიონობით ტურისტს იზიდავს.
ჩვენი საგამომცემლო ისტორიის განმავლობაში, National Geographic-მა მკითხველს სტოუნჰენჯის მრავალი ამაღელვებელი ამბავი და უჩვეულო ფოტო წარუდგინა. ჟურნალში გამოქვეყნებული ამ მეგალითების პირველი გამოსახულება მარჯვნივ წარმოდგენილი შავ-თეთრი აეროფოტოა. 1922 წლის მაისში გამოქვეყნებული ფოტოს გადაღება იმ პერიოდის უახლესი ტექნოლოგიის – თვითმფრინავის მეშვეობით მოხერხდა.
ფოტო: CENTRAL AEROPHOTO CO. LTD, NATIONAL GEOGRAPHIC IMAGE COLLECTION
ამ ნომრის მთავარი სტატიისთვის სტოუნჰენჯის წარმოჩენა განსხვავებულად გვინდოდა. ამისთვის დღეს არსებული უახლესი ტექნოლოგიები გამოვიყენეთ. ეს საქმე ორ საზრიან ფოტოგრაფს, ელის ზუს და რუბენ ვუს მივანდეთ.
შემდეგ გადავწყვიტეთ, ფოტოგრამეტრიის მეშვეობით შეგვექმნა მონუმენტის მაღალი რეზოლუციის მქონე 3D-მოდელი. მოვიწვიეთ National Geographic-ის მკვლევარი და ფოტოგრაფი მარტინ ედსტრომი. მან თავის გუნდთან ერთად დრონით ადგილის 7000-ზე მეტი გამოსახულება გადაიღო, შემდეგ ეს სურათები ციფრულ ასლებად გადაამუშავა; ამ გამოსახულებას გვერდის თავში ხედავთ.
ჩვენ ამბების თხრობის ჩვეულ საზღვრებს 134 წლის განმავლობაში ვარღვევთ. ახლაც სიამოვნებით წარმოგიდგენთ ჩვენს უახლეს ნამუშევარს. გადადით Instagram-ზე, @natgeo-ს გვერდზე სტოუნჰენჯის იმერსიული მოდელის დასათვალიერებლად.
გმადლობთ, რომ კითხულობთ National Geographic-ს.
ავტორი: დევიდ ბრინდლი, მთავარი რედაქტორის მოვალეობის შემსრულებელი
