ჩვენ მეცნიერების მხარეს ვართ!

ბოლო სამი წლის განმავლობაში ჩვენმა ჟურნალმა 30-ზე მეტი სტატია გამოაქვეყნა კლიმატის ცვლილებაზე.

ამ თემის მიმართ National Geographic-ის დამოკიდებულება არ იცვლება. წლის მეორე ნახევარში მოგითხრობთ არქტიკაზე, ანტარქტიდაზე, გალაპაგოსის კუნძულებსა და სხვა ადგილებზე, რომლებსაც დამთბარი მსოფლიო საფრთხეს უქმნის.

კლიმატთან დაკავშირებული თემების აქტიურად გაშუქება მნიშვნელოვანია, განსაკუთრებით იმ ეპოქაში, როდესაც გარკვეული ჯგუფების მოსაზრებით, კლიმატის რეალურ ცვლილებაზე ფაქტები არ არსებობს და ფუნდამენტური მეცნიერებაც ეჭვის ქვეშ დგება.

სიამაყით შეგვიძლია ვთქვათ, რომ National Geographic-ი არც ერთი პოლიტიკური მოსაზრების მხარეს არ დგას. მაგრამ გარკვეულ საკითხებში, ჩვენ ერთმნიშვნელოვნად წარმოვადგენთ მხარეს:

ჩვენ ვართ ფაქტებისა და საღი აზრის მხარეს!

ჩვენ ვართ მეცნიერების მხარეს!

ჩვენ ვართ ჩვენი პლანეტის მხარეს!

ყურადღებას იპყრობენ ის ჯგუფები, რომლებიც ხმამაღლა უარყოფენ კლიმატის ცვლილებას, მაგრამ მსოფლიომ უნდა გააცნობიეროს ამ პრობლემის რეალურობა.

მაქსიმალურად რომ ჩაგრთოთ მიმდინარე პროცესებში, ჩვენ კიდევ უფრო გავაფართოებთ ამ მიმართულებით კვლევას. National Geographic-ი სიღრმისეულად გააშუქებს კლიმატის ცვლილებას და აქტიურად შეეხება გარემოსდაცვით საკითხებსაც. ამასთან, სტატიებს თან დაერთვება გამორჩეული ფოტოები, გრაფიკები და რუკები. 

ეს ყველა ჩვენგანის მოვალეობაა, შევისწავლოთ, გავიაზროთ და გავიგოთ, როგორ ვიზრუნოთ უკეთ ამ პლანეტაზე. შესაძლოა, ამ მხრივ, ფილოსოფოს ერიკ ჰოფერის სიტყვები დაგვეხმაროს: „დრამატული ცვლილების ზღვარზე, სწორედ, სწავლულები გვევლინებიან მომავლის მემკვიდრეებად. ისინი მზად არიან იცხოვრონ იმ მსოფლიოში, რომელიც აღარ არსებობს”. 

გმადლობთ, რომ ეცნობით National Geographic-ს.