ჩვენი მიზნის აღსრულება

NATIONAL GEOGRAPHIC-ი ადამიანებს სამყაროს შეცნობაში ეხმარება. ჩვენ ვცდილობთ, რომ ჩვენი ხმა ყველა დაინტერესებულ ჯგუფს მივაწვდინოთ.

ჩვენ National Geographic Society-ს 131-წლიან შრომას ვეყრდნობით; საზოგადოების, რომელიც უამრავ ნიჭიერ ადამიანს ინოვაციურ გრანტებს სთავაზობს. კომპანია Walt Disney-სთან თანამშრომლობის შედეგად მოგვეცა წვდომა Disney+ პლატფორმაზე. Disney ატრაქციონების პარკებით, წიგნებითა და სხვა პროდუქტებით მილიონობით ადამიანის დაინტერესებას ახერხებს, ეს კი ჩვენს შესაძლებლობებს მსოფლიო მასშტაბით გაზრდის. ჩვენ აღფრთოვანებულნი ვართ ყველა იმ საშუალებით, რომელსაც ეს კავშირი გვისახავს სამომავლოდ.

წელს ჩვენმა სტატიებმა ჟურნალისტების საუკეთესო შეფასებები დაიმსახურა. ყურადღება გავამახვილეთ ისეთ საკითხებზე, როგორებიცაა პლასტმასით ოკეანის დაბინძურება, ველური ბუნების ტურიზმის საფრთხეები, კლიმატის ცვლილების გლობალური გავლენა; გამოვაქვეყნეთ ფოტოკოლექცია ქალებზე, რომლებიც მსოფლიოს ცვლიან. ჟურნალი პულიტცერის პრემიის ფინალისტი იყო. ჩვენმა ბეჭდურმა და ციფრულმა ჟურნალისტიკამ კი National Magazine Awards-ის ყველაზე პრესტიჟული ჯილდო, General Excellence მიიღო.

ჩვენი ტელემაყურებლები აღფრთოვანდნენ ოსკაროსანი ფილმით „თავისუფალი სოლო“, განიცადეს ებოლას ვირუსის კრიზისი „ცხელ ზონაში“ და გორდონ რემზისთან ერთად გაიცნეს მსოფლიოს სხვადასხვა ქვეყნის სამზარეულო გადაცემათა ციკლში „შეუცნობელი“. წარმატებული გამოდგა ჩვენი დოკუმენტური ფილმები: „აჩრდილების ზღვა“ – საფრთხეში მყოფი ზღვის ძუძუმწოვრების დაცვის შესახებ და „მღვიმე“ – გმირი ექიმი ქალის ამბავი, რომელიც სირიაში ადამიანების სიცოცხლეზე ზრუნავს.

თქვენი დახმარებით სალაროების რეკორდი მოვხსენით, გვქონდა უმაღლესი რეიტინგი და გავხდით ბრენდი, რომელსაც ინსტაგრამზე 100 მილიონზე მეტი მიმდევარი ჰყავს. ეს ყველაფერი იმაზე მიუთითებს, რომ არსებობს მოთხოვნა კონკრეტული მიზნის მქონე მედიაზე და ადამიანები ამ მოთხოვნას National Geographic-ში ეძებენ.

მინდა მადლობა გადაგიხადოთ, რომ იწერთ, კითხულობთ, უყურებთ და იზიარებთ ჩვენს აღფთოვანებას ამ სამყაროს მიმართ. თქვენი თანადგომა და მხარდაჭერა ჩვენი შთაგონების წყაროა.

გერი ნელი, თავმჯდომარე
National Geographic Partners