დედამიწის შემოვლა წარსულის ძიებაში

ალბერტ ლინი National Geographic-ის მკვლევარია, რომელიც მიცოცავს კლდეებზე და ეშვება მღვიმეებში, რათა ძველი ცივილიზაციების ნაშთები მოძებნოს თავისი დოკუმენტური სერიალისთვის, „დაკარგული ქალაქების აღმოჩენა ალბერტ ლინთან ერთად“. ძიებისას იგი იყენებს ისტორიულ მონაცემებს, კომპიუტერულ მოდელირებასა თუ აეროფოტოგადაღებას, თუმცა, ამავდროულად, ლაშქრობს ტყეებში, უდაბნოებსა და ჯუნგლებში, იმის მიუხედავად, რომ ავტოავარიის შედეგად მარჯვენა ფეხი დაკარგა და ახლა ტიტანის პროთეზი აქვს. ექსპედიციების დროს ლინმა პერუს მთები მოიარა, სადაც „ღრუბლების მეომრების“ შთამომავლებს ეძებდა; ომანში იმოგზაურა ბრინჯაოს ხანის ცივილიზაციის, მაგანის საკვლევად; ასევე იყო შოტლანდიაში, იმ ტომის ნასახლარზე, რომელმაც რომაელთა არმია მოიგერია. „ბევრია საკვლევი იმის შესახებ, თუ ვინ ვართ და საიდან მოვდივართ“, – ამბობს ლინი. მისი სერიალი მძაფრი ეპიზოდებითაა სავსე, იქნება ეს ბუნების ძალის გამოვლინებები თუ მომაკვდინებელ მორიელებთან დაბანაკება. ბიბლიური ქანაანელების კვალის ძიებისას კი ფეხის პროთეზი დაემტვრა. საბედნიეროდ, სათადარიგოც ჰქონდა.