დემონსტრაცია ტფილისში

1905 წლის 9 იანვარს, იმპერატორ ნიკოლოზ მეორის ბრძანებით, მრავალათასიანი მშვიდობიანი დემონსტრაცია დაარბიეს და რუსეთში რევოლუცია დაიწყო.

არეულობამ მოიცვა საქართველოც, რასაც სოციალურად დაუცველ  გლეხთა და მუშათა გაფიცვები და დემონსტრაციები მოჰყვა.

ამ პროცესის საპირისპიროდ, რუსეთის მეფის მხარდამჭერებიც ხშირად მართავდნენ რევოლუციის წინააღმდეგ მიმართულ `პატრიოტულ მანიფესტაციებს. ერთ-ერთი ასეთი დემონსტრაცია ტფილისში 1905 წლის 22 ოქტომბერს გოლოვინის პროსპექტზე გაიმართა. დემონსტრანტებს წინ ხატებითა და ბაირაღებით სასულიერო პირები ლოცვითა და გალობით მიუძღოდნენ, ხოლო უკან “წესრიგის დასაცავად, ჯარი და დრაგუნთა შეიარაღებული რაზმი მოჰყვებოდათ. მონარქისტები ხალხს, ხელმწიფის ერთგულების დასამტკიცებლად, ქუდების მოხდას, ხატებისა და იმპერატორის პორტრეტის საჯარო თაყვანისცემას აიძულებდნენ. შედეგად, მშვიდობიანი დემონსტრაცია სისხლიან დაპირისპირებაში გადაიზარდა.

დარბევას ათეულობით დემონსტრანტი შეეწირა და უამრავი ადამიანი დაშავდა. დაზიანდა მიმდებარე შენობა-ნაგებობები, გაიძარცვა მაღაზიები, რესტორნები და სასტუმროები. 24 ოქტომბერს, დაიკეტა სავაჭრო სახლები და მაღაზიები. შეწყდა სატრანსპორტო მოძრაობა, ქალაქის სხვადასხვა ადგილას გლოვის ნიშნად შავი დროშები გადმოფინეს. ამგვარი გაფიცვით ქალაქმა პატივი მიაგო 22 ოქტომბერს დაღუპულთა ხსოვნას.