ფიზიკის დიდი აუდიტორია

ივანე ჯავახიშვილის სახელობის თბილისის სახელმწიფო უნივერსიტეტის II კორპუსი 1940-იან წლებში არქიტექტორ მიხეილ შავიშვილის პროექტის მიხედვით აშენდა. შთამბეჭდავი შენობა უნივერსიტეტის I კორპუსის ორგანულ გაგრძელებას წარმოადგენს, თუმცა არა მარტო მისი ექსტერიერი, ინტერიერიც განსაკუთრებულია. მახსოვს, თავი ისტორიულ ფილმში მეგონა, როდესაც პირველად ფიზიკის დიდ აუდიტორიაში (ფდა) აღმოვჩნდი – თვალუწვდენელი ფანჯრები, კათედრის მიღმა ერთმანეთის მიყოლებით ჩამოკიდებული დაფები და ამფითეატრის მსგავსად განლაგებული ხის მერხები – ამ აუდიტორიაში მართლაც დიდი მეცნიერები კითხულობდნენ ლექციებს. 

აქ წარმოდგენილი ფოტოც სწორედ ამის დასტურია – ის 1962 წელს თანამედროვე ფიზიკის ერთ-ერთი ფუძემდებლის და 1922 წლის ნობელის პრემიის ლაურეატის, ნილს ბორის ლექციის შემდეგ არის გადაღებული. მასთან ერთად წარმოდგენილნი არიან მისი ვაჟი, ასევე დიდი ფიზიკოსი ოგე ბორი (ზის განაპირას), რომელმაც ნობელის პრემია 1975 წელს მიიღო და ქართული ფიზიკის ერთ-ერთი თვალსაჩინო წარმომადგენელი ელეფთერ ანდრონიკაშვილი (დგას).

რთული და მძიმე პერიოდის შემდეგ მეცნიერება საქართველოში ახალ სიცოცხლეს იძენს, შოთა რუსთაველის საქართველოს ეროვნული სამეცნიერო ფონდისა და იულიხის ცენტრის მხარდაჭერით უნივერსიტეტის ფიზიკის ფაკულტეტზე SMART|ლაბი გაიხსნა, რომელშიც ახალგაზრდა ფიზიკოსებს საშუალება ეძლევათ, ფეხი აუწყონ XXI საუკუნეს და განაგრძონ ის მდიდარი ტრადიცია, რომელიც ქართული ფიზიკის სკოლამ უანდერძა მათ.