გრიპის ხიდი

2009 წელს ილიას სახელმწიფო უნივერსიტეტმა, კემბრიჯის უნივერსიტეტსა და დაავადებათა კონტროლის ცენტრთან ერთად დაიწყო კვლევა, რომელიც დღემდე მიმდინარეობს და ეხება, ერთი მხრივ, გადამფრენ ფრინველებში გრიპის ვირუსის გავრცელებას და, მეორე მხრივ, მათ მიერ შინაურ ფრინველზე ვირუსის სხვადასხვა შტამის გადატანის პოტენციალს.

ვირუსების უმრავლესობის მიმართ, ფრინველები მარტივად გამოიმუშავებენ იმუნიტეტს და ერთი და იგივე დაავადება ორჯერ არ ემართებათ. ვირუსის სხვა შტამების მიმართ კი, დაუცველები რჩებიან. მსოფლიოში ვირუსების გავრცელებაში კავკასიას დიდი როლი უკავია: მაგალითად, ჯავახეთის ზეგანი ძალიან მნიშვნელოვანი საბუდარი და გამოსაზამთრებელი ადგილია. „აქ მინიმუმ სამი სამიგრაციო დერეფანი იკვეთება“, – ამბობს ორნითოლოგი ზურაბ ჯავახიშვილი, ილიას სახელმწიფო უნივერსიტეტის ასოცირებული მკვლევარი. მისი თქმით, სწორედ აქ ხდება ჩრდილო-აღმოსავლეთიდან (კასპიის ზღვა, აღმოსავლეთი ციმბირი) და დასავლეთიდან (ხმელთაშუა ზღვის აუზი და სხვა) ჩამოფრენილ ფრინველებს შორის ვირუსების სხვადასხვა შტამის მიმოცვლა. იმის დასადგენად, რომელი ფრინველი საიდანაა ჩამოფრენილი, მკვლევრები მოლეკულურ-გენეტიკური ანალიზის მეთოდს იყენებენ.