გზავნილები მეცნიერებისა და ინოვაციის მოწინავე ხაზიდან
დინოზავრის შესწავლა, რომელსაც 160 წლის წინ აღმოჩენილი განამარხებული ბუმბული ამშვენებდა, კვლავაც მიმდინარეობს.
დინოზავრის ფრთიდან?
მას შემდეგ, რაც 1861 წელს ბავარიის კირქვის კარიერში განამარხებული ბუმბული აღმოაჩინეს, ის პალეონტოლოგების კერპად იქცა: მისი სიძველის გააზრებაც კი რთულია; თანაც ის საოცრად ჰგავს თანამედროვე ფრინველის ბუმბულს. 150 მილიონი წლის ბუმბული პირველი განამარხებული ნაშთი იყო, რომელსაც Archaeopteryx lithographica უწოდეს. ამავე დასახელებისაა დინოზავრის სახეობა, რომელიც ამ ბუმბულის აღმოჩენის ადგილიდან სამ კილომეტრში იმავე ქანის შრეებში იპოვეს. მართლაც არქეოპტერიქსმა დაკარგა მისივე დასახელების ბუმბული? National Geographic Explorer-ი რაიან კარნი, პალეონტოლოგი სამხრეთ ფლორიდის უნივერსიტეტიდან, ამბობს, რომ პასუხი ცალსახად დადებითია. შარშან შემოდგომაზე Scientific Reports-ში გამოქვეყნებულ სამეცნიერო ნაშრომში კარნი ამტკიცებს, რომ ბუმბული მართლაც არქეოპტერიქსს ეკუთვნის და უფრო მეტიც – მისი საშუალებით მან დინოზავრის მარცხენა ფრთის ზედაპირის აღდგენა შეძლო. კარნის ახლა შეუძლია დაადგინოს, როგორ იქნევდა ფრთას არქეოპტერიქსი და შეეძლო თუ არა მას თავისივე ძალით აფრენა. – მაიკლ გრეშკო
პერსონალური აღჭურვილობა უადგილოდ
COVID-19-თან ბრძოლა გარემოს დიდ ზიანს აყენებს. უამრავი პერსონალური დამცავი აღჭურვილობა გადაიყარა ნაგავში. ერთ პერიოდში, 3,4 მილიარდი პირბადე იყრებოდა დღეში. ის რაც ადამიანს იცავდა, ახლა ჩვენს გარემოს ვნებს, ასეა ეს ქორჭილაც, რომელიც ნიდერლანდებში, ხელთათმანში გამოემწყვდია და ათასობით ფრინველი, პირბადის ხაფანგში რომ გაება. – ენი როთი
კბეჩისას წარმოქმნილი მაგნიტური ველი
ვენერას ბუზიჭერიას ყბებისმაგვარი ფოთლები ნადავლის დაჭერის დროს აქტიურდება. ახალმა კვლევებმა დაადასტურა, რომ მცენარე მცირე მაგნიტურ ველს წარმოქმნის. ამგვარი ველები მხოლოდ ორ სხვა მცენარეშია გამოვლენილი: ცერცვასა და ერთუჯრედიან წყალმცენარეში. მეცნიერები ფიქრობენ, რომ ეს მაგნიტური ველი იმ ელექტრული იმპულსების თანმდევია, რომლებიც ბუზიჭერიას ფოთლების დაკეცვას განაპირობებს. ადამიანის ტვინში არსებული ბიომაგნეტიზმი კარგად არის შესწავლილი, მცენარეებისა კი – ნაკლებად. – ენი როთი