ლემურების გამალებული ძიება

კატისებრ ლემურებს მთელ მსოფლიოში იცნობენ და უსაყვარლეს არსებებად თვლიან, მეტწილად ანიმაციური ტრილოგია „მადაგასკარის“ დამსახურებით, რომელშიც ლემურთა მეფეს საშა ბარონ-კოენი ახმოვანებს. პოპულარობის მიუხედავად, ამ ქარიზმატული პრიმატების ბუნებაში ნახვა თითქმის შეუძლებელია – მხოლოდ მადაგასკარის სამხრეთისა და სამხრეთ-დასავლეთის მიუვალ ტყეებში ბინადრობენ. „იქამდე მისასვლელი გზები არ არსებობს ან თითქმის გაუვალია“, – გვიხსნის ანდრეა ბადენი, რომელიც ჰანტერის კოლეჯის (ნიუ-იორკი) პრიმატოლოგია. წლების განმავლობაში ლემურთა პოპულაციები შეზღუდული აღწერებიდან ექსტრაპოლაციით განისაზღვრებოდა, რაც მეცნიერებს აფიქრებინებდა, რომ მათი რაოდენობა მკვეთრად იკლებდა. 2018-2019 წლებში ბადენმა და მისმა გუნდმა პოპულაციის მასშტაბური აღწერა ჩაატარეს და მათდა გასაკვირად ლემურები 83 მონახულებული ადგილიდან 65-ში დახვდათ, მათ შორის 3 ისეთ ზონაშიც, საიდანაც ეს სახეობა გამქრალი ეგონათ. „ჩვენი ძალისხმევის გაზრდის შედეგად პოპულაციის სავარაუდო რიცხოვნობა ფაქტობრივად გაორმაგდა“, – ამბობს ბადენი. გუნდის კვლევის შედეგები 2023 წელს ჟურნალ Oryx-ში გამოქვეყნდა. ჰაბიტატის დაკარგვის, არამკვიდრი მტაცებლების (ძაღლების და კატების) და ცხოველებით უკანონო ვაჭრობის გამო სახეობა კვლავაც საფრთხეშია, მაგრამ კატისებრი ლემური საერთაშორისო პრიმატოლოგიის საზოგადოების გადაშენების საფრთხეში მყოფი 25 პრიმატის სიიდან უკვე ამოღებულია.