ვინ:
თამარ მირიანაშვილი, 37 წლის, თბილისელი, ფოტოგრაფი და კინოდოკუმენტალისტი
სად:
სოფელი ჭობარეთი, სამცხე-ჯავახეთი, საქართველო
რა:
Nikon D800, nikkor 24-70/2,8
ამბავი:
ფოტოკონკურსში „მშობლიური გემო” მონაწილეებს ვთხოვეთ ჩვენთვის გაეზიარებინათ კადრები, რომლებიც საქართველოს კულინარიულ ტრადიციებს ასახავდა. გვინდოდა ჩვენთვის ეჩვენებინათ, თუ როგორ იბადება ქართული გემო, ამ გემოს შემქმნელი ადამიანები და გარემო, რომელშიც „მშობლიური გემოს” მოგონებები იძერწება. თამარ მირიანაშვილის კადრი იმ მომენტს ასახავს, როდესაც მესხი ქალი ტენილს ამზადებს: „ყველის ამოყვანა მშვიდი და წყნარი საქმე მეგონა, სანამ მესხური ტენილის ამოყვანის პროცესს დავესწრებოდი”, – ამბობს თამარი – „თურმე წამით არ უნდა მოდუნდე. ადუღებული წყლით სავსე ქვაბიდან უჩვეულო სისწრაფით ამოაქვთ ყველის მსხვილი რგოლები და ორივე ხელით ატრიალებენ. რგოლები უწყვეტია, დატრიალების შემდეგ ჰაერში ატკაცუნებენ მთელ ამ მასას და ისევ ქვაბში აბრუნებენ და ასე უსასრულოდ გრძელდება, სანამ ეს ხვეულა იმ უწვრილეს ძაფებად იქცევა, რომელსაც ჩვენ მესხურ ტენილად ვიცნობთ. აქ დიდი მოთმინება და გამძლეობაა საჭირო. მესხური ყველი მხოლოდ ქალებს ამოჰყავთ.
გახდი National Geographic საქართველოს YourShot-ის ნაწილი და გააზიარე შენი კადრი yourshot.natgeo.ge