მტკიცე ნაბიჯით კაცობრიობის ბილიკებზე
პოლ სალოპეკს უკვე კარგად იცნობს ჩვენი მკითხველი, იცის, რომ პულიტცერის პრემიის ორგზის ლაურეატი მწერალი და ჟურნალისტი უკვე ცხრა წელიწადია მოგზაურობს. მან ეთიოპიიდან დაიწყო და სამხრეთ ამერიკის უკიდურეს სამხრეთ წერტილამდე ფეხით მიუყვება ჩვენი წინაპრების ნაკვალევს, ამიტომაც უწოდა თავის პროექტს „ედემიდან სვლა“.
მისი დევიზი მარტივია – „შეანელე, შეიცანი ადამიანი“. იგი ალბათ ერთ-ერთია (თუ არა ერთადერთი) იმ იშვიათ გამონაკლისთაგან, რომლებიც ცდილობენ ფეხი არ აუწყონ XXI საუკუნის ტემპს; პირიქით, იგი გამაოგნებელი სიჯიუტით ეწინააღმდეგება ყველაფერს, რაც სამყაროს საფუძვლიან შემეცნებაში უშლის ხელს და მიუხედავად მრავალი, ზოგჯერ აბსურდული, სირთულისა, მაინც ყოველთვის ახერხებს განაგრძოს თავისი დაუჯერებელი მოგზაურობა.
National Geographic Society თავიდანვე აფინანსებს პოლ სალოპეკის პროექტს, ის კი სამყაროს მისეულ, ყველა სხვა ჟურნალისტისაგან განსხვავებულ ხედვას მუდმივად გვიზიარებს. ჟურნალი უკვე მეათედ აქვეყნებს პოლის ვრცელ სტატიას, სადაც იგი მოგვითხრობს ციხესიმაგრეებსა და გალავნებზე, რომლებსაც ისტორიული ომების კვალი ატყვია, თუმცა, პოლის აზრით, „გალავანი ასევე ინახავს შეუწყნარებლობას, ადამიანთა ირაციონალურ კვლასა და სტაგნაციას“.
მისი სტატია „მოგზაურობის გაკვეთილები“ კიდევ ერთხელ გვაფიქრებს იმაზე, თუ რა არის ამქვეყნად მართლაც ღირებული და კიდევ ერთხელ გვიჩვენებს სამყაროს თავისი უკიდურესობებით. ეს ერთგვარი რეტროსპექტივა პოლის მიერ უკვე განვლილი, თითქმის ნახევარი გზისა, ადამიანის ბუნებისთვის დამახასიათებელი ნათელი და ბნელი მხარეების დემონსტრაციაა, რომელიც გვაფიქრებს იმაზე, თუ ვინ არის მზად გაუმკლავდეს ამ საუკუნის ბუნდოვან გამოწვევებს და, თანაც, შეინარჩუნოს ფიზიკური თუ მენტალური ჯანმრთელობა.
გმადლობთ, რომ კითხულობთ National Geographic Magazine – საქართველოს.