მტრედების ახალი მისია

2016 წლის გაზაფხულის ერთ მშვენიერ დილას ლონდონის ცაში 10 მტრედი გაუშვეს. ზოგიერთ მათგანს პატარა მოწყობილობა ეკეთა ჰაერში აზოტის დიოქსიდისა და ოზონის რაოდენობის გასაზომად. ეს მტრედების „საჰაერო პატრულის“ პირველი „მისია“ იყო.

ამ ფრინველებს ადამიანები უძველესი დროიდან იყენებდნენ. ფრანგებმა ორი მტრედი I მსოფლიო ომში გაწეული სამსახურისთვის დააჯილდოვეს. II მსოფლიო ომის პერიოდში მტრედებს ყუმბარების სამართავად წვრთნიდნენ – ფრინველები ყუმბარების შიგნით მდებარე ეკრანზე ნისკარტის კაკუნით მიმართავდნენ მათ გასანადგურებელი სამიზნისკენ.

თანამედროვე „მტრედების პატრული“ Plume Labs-მა ლონდონში იმისათვის შექმნა, რომ ხალხს გაეგო, რა არის ჰაერში, რომელსაც ის სუნთქავს. ერთ-ერთი კვლევის თანახმად, ლონდონის ჰაერის დამაბინძურებელი აგენტები წელიწადში 9416 ადამიანის სიკვდილს იწვევს.

ხრიკმა გაამართლა – „მტრედების პატრულს“ მოხალისეებიც აჰყვნენ და ისეთივე მოწყობილობით, რაც მტრედებს ეკეთათ, ლონდონში 2100 კილომეტრის მანძილზე გაიზომა ჰაერის ხარისხი.