დედამიწის პეიზაჟები გასაოცარი შეიძლება იყოს, თუმცა რუბენ ვუსთვის ეს არ არის საკმარისი – ფოტოგრაფის, ვიზუალური არტისტის და მუსიკის პროდიუსერის აღქმით ამ დიდებულ მთებს, მყინვარებსა და სანაპიროებს რაღაც აკლია, კერძოდ კი – არაბუნებრივი განათება.

ეს იდეა შეცდომიდან დაიბადა. როგორც კი ერთ ღამეს, კალიფორნიაში, სიკვდილის ველთან, უკუნეთ სიბნელეში „თაიმლეპსით“ კადრების გადასაღებად კამერა ჩართო, სატვირთო მანქანამ ჩამოიარა და ნათურების მკვეთრი განათებით მთელი კადრი გააფუჭა.

„თავიდან გავღიზიანდი, თუმცა კადრებს რომ დავხედე, მოვიხიბლე. ეს იყო არაბუნებრივი განათება ბუნებრივ გარემოში“, – ამბობს ვუ.

ფოტოგრაფმა დრონებით ისეთი ადგილები გაანათა, როგორებიცაა ტბები, კანიონები თუ უდაბნოს ქვიშაქვის სვეტები. შემდეგ მაღალი ექსპოზიციით გადაღებული რამდენიმე გამოსახულება ერთმანეთს დაადო, ზოგიერთ შემთხვევაში ოდნავ დაამუშავა კიდეც, რათა დრონი გაექრო და მხოლოდ განათება დაეტოვებინა.

საბოლოოდ, უჩვეულო და არაამქვეყნიური პეიზაჟები მივიღეთ, რომლებიც მნახველს საგონებელში ჩააგდებს.
ვუ ფოტოებს აშშ-ში იღებს, თუმცა, მისივე თქმით, დედამიწაზე ნებისმიერი პეიზაჟის გადაღება შეიძლება ასე.
ვუს განზრახული აქვს, შექმნას ფოტოსერია, რომელიც დაგაფიქრებთ ხელოვნებასა თუ ბუნებაზე და უფრო შემოქმედებითად დაგანახებთ მას.