უცხოპლანეტელების ძიებაში

უცხოპლანეტელების „გამოჩენის“ შესახებ უკვე ათწლეულებია პერიოდული ბუმი მოიცავს ხოლმე მსოფლიოს. რა თქმა უნდა, გამონაკლისი არც საქართველოა, მახსოვს, ჩემს ბავშვობაშიც იყო ერთ-ერთი ტალღა, როდესაც ადამიანები ყვებოდნენ, თუ როგორ დაინახეს „მფრინავი თეფში“ ან თავად უცხოპლანეტელი და ზუსტადაც აღწერდნენ მათ. ყვებოდნენ ამბებს, როგორ გაჩერდა, უყურა და მერე კედელში გაუჩინარდა მაღალი, ვერცხლისფერ პრიალა ტანისამოსში გამოწყობილი ადამიანისმაგვარი არსება, ან კი როგორი ელვისებური სისწრაფით გაქანდა და გაქრა „ხომალდი“, რომელიც მათ წინ, გარკვეული დროის მანძილზე ეკიდა ჰაერში. ვიღაცის წარმოსახვაში უცხოპლანეტელი სპილბერგის კეთილ ET-სთან ასოცირდებოდა, ვიღაცისთვის – კიმ ბესინჯერის მომხიბვლელ გმირთან ფილმიდან „ჩემი დედინაცვალი უცხოპლანეტელია“, ვიღაცისთვის კი რეი ბრედბერის მარსელებთან, რომლებიც არც თუ გულღიად შეხვდნენ დედამიწელებს.

ამ სერიოზულ, თუ მსუბუქ სამეცნიერო ფანტასტიკის მიღმა, კი მეცნიერები რთულ კვლევით პროექტებს ახორციელებდნენ, რათა რეალურ ცოდნაზე დაყრდნობით  გაერკვიათ, არსებობს თუ არა სიცოცხლე სხვაგან და თუ არსებობს – როგორია ის.

ამ ნომერში ჯეიმი შრივი მოგითხრობთ ნამდვილ ისტორიას იმისა, თუ როგორ ეძებენ მეცნიერები სიცოცხლის ნიშნებს დედამიწის მიღმა, რამდენად რეალურია, რომ ის მართლაც არსებობდეს და კიდევ დაახლოებით რამდენი დროა საჭირო მის დასაფიქსირებლად. ყოველივე ამის წარმოდგენაში, კი სპენსერ ლოუელის არაჩვეულებრივი ფოტოსესია და დანა ბერის გამაოგნებელი ილუსტრაციები დაგეხმარებათ.

გმადლობთ, რომ კითხულობთ National Geographic საქართველოს.