ინდოეთში ქალთა უსაფრთხოების სტატისტიკური მონაცემები ძალიან არასახარბიელოა. 2011 წელს დანაშაულთა აღრიცხვის ეროვნული ბიუროს მონაცემებით ქალების წინააღმდეგ ჩადენილი 228 650 დანაშაული დაფიქსირდა, მკვლელობის, გაუპატიურების, გატაცებისა და სექსუალური შევიწროების ჩათვლით. იმ წელს საერთაშორისო კვლევამ ინდოეთს ქალებისთვის საშიში ქვეყნების სიაში მეოთხე ადგილი მიანიჭა ავღანეთის, კონგოს დემოკრატიული რესპუბლიკისა და პაკისტანის შემდეგ. საზოგადოებრივ სივრცეებში ქალებთან მოპყრობა ინდოეთში უკვე თაობების განმავლობაში ითვლება პრობლემურ საკითხად, თუმცა ჯიოტი სინგჰის, ასევე ნირბჰაიას სახელით ცნობილი ქალის შემთხვევის საფუძველზე ერთგვარი გარდატეხა მოხდა – გაჩნდა პროტესტი იმ ფაქტის მიმართ, რომ საფრთხე ქალებისთვის ყოველდღიური ცხოვრების შემადგენელი ნაწილია.

ადგილობრივმა და ეროვნულმა სააგენტოებმა ქალთა უსაფრთხოების ახალი ინიციატივების დაფინანსება დაიწყეს. 2013 წელს მოქმედმა ხელისუფლებამ 145 მილიონი დოლარი გამოყო ქალების უსაფრთხოების გაძლიერებისკენ მიმართული ზომების მისაღებად. ამჟამინდელი მთავრობის დაპირებით თითქმის სამმაგი თანხა მოხმარდება იმას, რომ რვა დიდი ქალაქი, მათ შორის დელი, უფრო უსაფრთხო, უკეთ განათებული და, შესაძლოა, ქალებისადმი მეტად გულისხმიერიც გახდეს.

პირველი ნაბიჯები უკვე გადადგმულია: დელიში პოლიცია ქალებს თავდაცვის 10-დღიან სწავლებას სთავაზობს და ქალაქის სხვადასხვა წერტილში მოზრდილ ჯგუფებთან ადგილზეც ატარებს წვრთნებს. ინდოეთის სამხრეთით მდებარე კერალას შტატში მხოლოდ ქალებით დაკომპლექტებული ეკიპაჟები არსებობს, რომლებიც ქუჩებში პატრულირებენ და ქალებისგან შემოსულ კრიზისულ გამოძახებებზე მუშაობენ.

ურბანული საზოგადოებრივი ტრანსპორტის სექტორში ქალთა მომსახურება უმეტესად ფერით გამოიცნობა. ვარდისფერი მოტორიზებული რიქშები ქალებისთვისაა. მეტროს მატარებლებში ცალკე გამოიყო ქალთა ვაგონები. სატრანზიტო სადგურებში შემოწმებაზე ქალები ცალკე რიგებში დგანან.

რთულია, შეცვალო მამაკაცების წარმოდგენა, თითქოს ქალები მათ საჯარო სივრცეში ეცილებიან, თუმცა, შეუძლებელი არაფერია.

სტატიის ავტორი ნილანჯანა ბოუმიკი ნიუ-დელიში მცხოვრები ჟურნალისტია, რომლის საქმიანობაც ქალთა გაძლიერებასა და პოლიტიკურ საკითხებზეა ორიენტირებული. ფოტოჟურნალისტი საუმია კანდელვალი ასევე ნიუ-დელის მკვიდრია და გენდერულ და გარემოსდაცვით თემებზე მუშაობს. 

სრული ვერსია წაიკითხეთ ნოემბრის ნომერში.