წინ, წარსულისკენ

დედამიწის ზურგზე არ მეგულება ადამიანი, რომელსაც განსაკუთრებით არ იზიდავს და აინტერესებს დინოზავრების ეპოქა. ალბათ, 6 წლის ვიქნებოდი, სახლში უზარმაზარი ალბომი რომ აღმოვაჩინე, თვალიერებისგან გაცვეთილი კუთხეებით, შელახული ყდითა და მაინც შესამჩნევი სიყვარულით შენახული. გადავშალე და მგონი მთელი დღე არ დამიხურავს, ვათვალიერებდი, ერთმანეთს ვადარებდი, კარადასთან მიმქონდა და მერე ისევ უკან მომქონდა წიგნი – ჩემ წინ გაცოცხლებული დინოზავრების ეპოქა არ მეთმობოდა. 

ბევრი წლის შემდეგ, მუზეუმში დავიწყე მუშაობა და ერთ მშვენიერ დღეს იგივე ალბომი (ნამდვილად) დიდი პალეოანთროპოლოგის, ბატონი აბესალომ ვეკუას სამუშაო მაგიდაზე აღმოვაჩინე. სიხარულისგან კინაღამ გადავირიე, ბატონ აბესალომსაც მეტი რა უნდოდა, ვინ იცის მერამდენედ, დაუზარებლად დაათვალიერა ალბომი – ჩემთან ერთად; ყველა კითხვაზე მიპასუხა და თითოეული ილუსტრაციის ნამდვილთან მსგავსებაზეც გამიზიარა საკუთარი აზრი. მიყვებოდა, თუ როგორ ხდება გარეგნობის აღდგენა, არქეოლოგიურ მასალაზე დაყრდნობით, რომ ცდომილების ალბათობა მაინც დიდია, თუმცა ამ ალბომის გამოცემის შემდეგ, ბევრად წინ წავიდა მეცნიერება და დღეს უფრო მეტი სიზუსტითაა შესაძლებელი ინფორმაციის მიღება და წარსულთან მიახლოება. 

ამ ნომერში წარმოგიდგენთ სტატიას „ყველაზე საკვირველი ფრთოსანი არსებები” – ალბათ ხვდებით, როგორ ვშთანთქეთ ის მეც და ყველა National Geographic-ელმაც. დარწმუნებული ვარ, ვერც თქვენ დარჩებით გულგრილი და სიამოვნებით წაიკითხავთ უახლეს ცნობებს იდუმალი პტეროზავრების საკვირველი ფორმების, ზომებისა და ქცევების შესახებ, რომლებიც აღმოჩენების ბოლოდროინდელი ტალღის შედეგად გახდა ცნობილი.

გმადლობთ, რომ კითხულობთ National Geographic-ს.