1300 წლის აბრეშუმის საგანძური

ცეცხლის ალი, მხეცები, იარაღი და ვარსკვლავები ხის საქსოვი დაზგებით იხატება ფარჩაზე, 1300 წლის ქსოვილზე, რომელიც ერთ დროს ჩინეთის ელიტისთვის იყო განკუთვნილი, ახლა კი ახალგაზრდა დიზაინერებში სარგებლობს პოპულარობით.

ხელოვნების ეს სახეობა იმდენად კომპლექსურია, რომ ვეტერანი ოსტატებიც კი დღეში ქსოვილის მხოლოდ 5 სანტიმეტრს ქმნიან. ტრადიციული დაზგების სიგრძე 5,5 მეტრს აღწევს და ათასობით ნაწილი აქვს, რომელთა ამუშავებას ათობით მოქმედება სჭირდება.

ფარჩა ჩინეთში ტანის დინასტიის დროს (ახ. წ. 618-907 წწ.) გამოჩნდა და მთელ ქვეყანაში რეგიონული ნაირსახეობები განვითარდა.

ფაბრიკებში შეუძლებელია ამ კომპლექსური ქსოვილის ასლის შექმნა. „ის მხოლოდ ტრადიციულ დაზგაზე შეიძლება მოიქსოვოს“, – ამბობს ფენგ ჭაო, ხანგჭოუში ჩინეთის ეროვნული მუზეუმის დირექტორი. ამ ავთენტიკურობას ხნიერი ჩინელები „გულით“ აფასებენ და მას კულტურული მემკვიდრეობის საამაყო სიმბოლოდ მიიჩნევენ. ტანსაცმლის ახალბედა ჩინელმა დიზაინერებმა დაიწყეს ტრადიციულ მქსოველებთან თანამშრომლობა, რათა თავიანთი ტანისამოსი ფენიქსების, ღრუბლების და დრაკონების გამოსახულებით შეამკონ. დიზაინერმა ჩენ ლივენმა შარშან შექმნა ახალი თაობის მომხმარებელზე გათვლილი შარფებისა და აქსესუარების კოლექცია ვეფხვის ტრადიციული ორნამენტებით. ამგვარად, უძველესი ფარჩა ჩინეთის მომავალშიც მჭიდროდაა ჩაქსოვილი.