არსებობს სიტყვები, რომელთა გაგონებაც არასოდეს მოგინდება. “შენს სახლში გველია!” – ეს ფრაზა ალბათ მათ შორის ერთ-ერთ პირველ ადგილს დაიკავებს. 15-ოდე წლის წინ მე და ჩემი სამი საუკეთესო მეგობარი – ბეჟან ლორთქიფანიძე, ზურაბ გურიელიძე და ირაკლი შავგულიძე – ვაშლოვანის ნაკრძალში ვიყავით საკვლევად. საველე გასვლიდან დაბრუნებულებმა გზად, ლოდის ნაპრალში გიურზა შევნიშნეთ. ბეჟომ (მაშინ გამოუცდელმა, მაგრამ რისკიანი კვლევაძიების მოყვარულმა სტუდენტმა) დაუფიქრებლად გაიშვირა ხელი გველისკენ. ზურას ყვირილმა არემარე შეძრა: “რას შვრები!” კიდევ კარგი, ინციდენტმა მშვიდობიანად ჩაიარა… 

მართალია, გიურზა “ჩვენი გველებიდან” ყველაზე საშიშია, მაგრამ ის მაინც ულამაზესი ცხოველია. რომბებით მოხატულს ძლიერი, გრაციოზული სხეული და ბრძნული თვალები აქვს. ჩემი აზრით, მსოფლიოში საუკეთესო გველია, მიუხედავად იმისა, რომ მამბა უფრო ელვარეა, კობრა კი – უფრო წარმოსადეგი. აქ უბრალოდ სუბიექტური ვარ – ის ჩვენი გველია, ჩვენი ფაუნის სიამაყე!

ამ საბედისწერო სილამაზეს სხვა მხარეც აქვს, ამაზე კი ჟურნალის ერთ-ერთი სტატია მოგვითხრობს. ზოლტან ტაკაჩი, შხამების ექსპერტი და ეროვნული გეოგრაფიული საზოგადოების მკვლევარი, თვლის, რომ სამყაროში არსებულმა 20 მილიონმა ტოქსინმა შესაძლოა ყველაფერი (ავთვისებიანი სიმსივნით დაწყებული უბრალო ტკივილით დამთავრებული) განკურნოს და საქმით ამტკიცებს თავის სიტყვებს: “შხამმა ფარმაკოლოგიას სრულიად ახალი გზები გაუხსნა”. მოკლედ, ტოქსიკოლოგია და ფარმაკოლოგია მედლის ორი მხარეა. ეს ჩვენმა წინაპრებმა კარგად იცოდნენ. ასკლეპიოსის კვერთხს გველი ახვევია და მედიცინის დღევანდელი სიმბოლოც ხომ თასზე შემოხვეული გველია.

ისე, ცოდვა გამხელილი სჯობს და რედაქციაში დიდი დავა გვქონდა, თუ რომელი ფოტო გამოგვეტანა გარეკანზე. ბოლოს მაინც გადავწყვიტეთ, რომ ქართველებში ზოგჯერ გაუგებარი პანიკის გამომწვევი ულამაზესი გველის სურათი დაგვესვა. 

დაე, 2013 წელი ამ ცხოველისთვის დამახასიათებელი ბრძნული გადაწყვეტილებების წელი ყოფილიყოს!