11 წელი ქართულ ენაზე

National Geographic – საქართველო 11 წლისაა! ეს ამბავი ოქტომბრის, კოსმოსისადმი მიძღვნილ სპეციალურ გამოცემაშიც გახარეთ და ნოემბრის ნომერშიც აღვნიშნავთ – ამჯერად უკვე, ტრადიციისამებრ, ქართული გარეკანით.

ჩვენი მთავარი სტატია „აკრძალული ენა“ მტკივნეულ და სათუთ თემას ეხება. სტატიის ავტორი და ფოტოგრაფი თაკო რობაქიძე დიდი ხანია იკვლევს საქართველოში ომების შედეგად შექმნილ ვითარებას. ამჯერად თაკოს ობიექტივში არიან გალელები – ადამიანები, რომლებიც სამი ათწლეულის განმავლობაში ურთულესი პირობების ფონზე ინარჩუნებენ ეროვნულ იდენტობას და კავშირს მდინარე ენგურის ორ ნაპირს შორის. გალის რაიონში, სადაც მოსახლეობის აბსოლუტური უმრავლესობა ეთნიკურად ქართველია, 2021 წელს აფხაზეთის დე ფაქტო ხელისუფლებამ რუსიფიკაციის რადიკალურ ზომას მიმართა და სრულიად აკრძალა სკოლებში ქართულ ენაზე სწავლება. რა ხდება ასეთ დროს? ამაზე პასუხს სტატიის გმირები და ავტორი ერთად ეძებენ.             

ქართულ ენას და დამწერლობას ეძღვნება ასევე რუბრიკა „საქართველოს ევროპული ისტორია“. ქალაქ რუსთავის ერთ თავისებურებაზე მოგითხრობთ ქართველი ანთროპოლოგის ესეი, ხოლო ბულგარელი ფოტოგრაფი წარმოგიდგენთ ფოტოპროექტს, რომლის ფარგლებშიც მან თითქმის მთელი საქართველო შემოიარა.

რაც შეეხება ამბებს მსოფლიოს სხვადასხვა წერტილიდან: ვრცლად გიყვებით კლიმატის ცვლილებასთან ბრძოლის ინოვაციურ ხერხებზე, თავგადასავლებით სავსე ექსპედიციასა და ცელნამგალა ვეშაპების ნადირობის ტექნიკაზე.

135-წლიანი ისტორიის მქონე ჟურნალი National Geographic-ი დღეს 25 ენაზე გამოიცემა და ყველას გვაერთიანებს რწმენა, რომ ჩვენი მოთხრობილი ამბებით შეგვიძლია ხელი შევუწყოთ სამყაროს უკეთ შეცნობას და ამ სამყაროში ჩვენი როლის გააზრებას.

მადლობას გიხდით ყველას, ვინც 11 წელია იზიარებთ ჩვენს ცნობისმოყვარეობას და მათაც, ვინც ახლა შემოგვიერთდით.