მსუბუქწონიანი თვითმფრინავი მოწყდა ხრეშიან ასაფრენ ბილიკს და მალე მხოლოდ ერთი ყვითელი წერტილი თუ ლივლივებდა ტუნდრის ყავისფერ „ზღვაზე“. აი, ქვემოთ, მიწაზე კი აშშ-ის ალბათ ყველაზე სადავო უძრავი ქონება იყო გადაჭიმული.

არქტიკის ეროვნული აღკვეთილის (Arctic National Wildlife Refuge – ANWR) სანაპირო დაბლობი უკვე ათასწლეულების განმავლობაში სთავაზობს კარიბუს ჯოგებსა და გადამფრენ ფრინველებს საზაფხულო ბინას, თეთრ დათვებს გამოსაზამთრებელს, ხოლო მკვიდრ ალასკელებს სანადირო ტერიტორიას. ის შეიძლება ინახავდეს 7,7 მილიარდამდე ბარელ ნავთობსაც და სწორედ აქ ჩნდება დილემა.

ეს აღკვეთილი (7,8 მილიონი ჰექტარი) კონგრესმა 1980 წელს დააარსა, მაგრამ იმ პერიოდში ქვეყანაში ნავთობის კრიზისი იყო, თანაც უკვე მეორე ბოლო ათწლეულში. აღნიშნულ მიწაზე ნავთობის მდიდარი საბადოების არსებობას ვარაუდობდნენ – 607 000 ჰექტარზე, ასე რომ კანონმდებლებმა ღიად დატოვეს აღკვეთილის საკითხი და ამ ტერიტორიაზე დავა მას შემდეგ გრძელდება.

„აქ რომ პირველად ჩამოვედი, 70-იანი წლების დასაწყისში, ტერიტორია ხელუხლებელი დამხვდა“, ამბობს ალასკის ნადირობისა და თევზაობის დეპარტამენტის ყოფილი ბიოლოგი და პილოტი პეტ ვალკენბურგი. „ახლა ყოველ ჯერზე, როდესაც კი ANWR-ი პრესაში ჩნდება, მას ხალხის მორიგი ჯგუფიც მოჰყვება“.

არავინ იცის ზუსტად, რამდენ ნავთობს იტევს ეს დაბლობი ან როგორ იმოქმედებს ნავთობის ძიება ამ ველურ ბუნებაზე, თუმცა, გარკვეული სახის კონფლიქტს ვერ ავცდებით. ვიდრე აშშ-ის შინაგან საქმეთა სამინისტრო იჯარებს გასცემს, მან გარემოს ზეგავლენაზე უნდა ჩაატაროს კვლევა. ორივე დაპირისპირებული მხარე ძალებს იკრებს და ხანგრძლივი ლეგალური თუ პოლიტიკური ბრძოლისათვის ემზადება.

„ვიცით, რომ გარემოსდაცვითი საზოგადოება გააპროტესტებს გეგმის მონახაზს, დაეჭვდება გაყიდვებსა და საბოლოო შედეგში“ – ამბობს ალასკის ნავთობისა და ბუნებრივი აირის ასოციაციის პრეზიდენტი კარა მორიარტი.

სრული ვერსია წაიკითხეთ ივნისის ნომერში.