ამ სახეობის დაცვა უკვე დაგვიანებულია

კალიფორნიული ზღვის ღორი, „ვაკიტა“ გადაშენების პირასაა. ეს პატარა არსება მექსიკასთან, კალიფორნიის ყურეში ბინადრობს. მისი ზუსტი რაოდენობა არავინ იცის; მეცნიერების გამოთვლებით მხოლოდ 19 ინდივიდია დარჩენილი. რაოდენობის შემცირება თუ არ შენელდა, 2021 წლისთვის ეს სახეობა საერთოდ გაქრება. ჩნდება კითხვა: როგორ დავუშვით ეს?

მეტრნახევრიანი ძუძუმწოვარი ყველაზე პატარა წარმომადგენელია ვეშაპისებრთა ოჯახისა, რომელიც ვეშაპებს, დელფინებსა და ზღვის ღორებს აერთიანებს. ვაკიტა ესპანურად „პატარა ძროხას“ ნიშნავს და ეს სახელი მას თვალებთან არსებული მუქი შეფერილობის გამო შეარქვეს.

1950 წელს ამ სახეობის აღმოჩენისთანავე მეცნიერები მიხვდნენ, რომ მას საფრთხე ემუქრებოდა. ვაკიტები კრევეტებისა და ტოტოაბასთვის განკუთვნილ ბადეებში ხვდებოდნენ. 1975 წელს ტოტოაბა გადაშენების პირას მყოფ თევზის სახეობად გამოაცხადეს და მექსიკამ მასზე თევზაობა აკრძალა, თუმცა ბრაკონიერობა ნარკოტიკებით ვაჭრობაზე მარტივია, ამიტომ თევზაობა გრძელდება და, შესაბამისად, ვაკიტების რაოდენობაც იკლებს თანჭერის გამო.

2005 წელს მექსიკამ ყურის ნაწილი ვაკიტების თავშესაფრად გამოაცხადა, თუმცა 2008 წლიდან 2016 წლამდე მათი რაოდენობა 200-დან 30-მდე შემცირდა. ველურ ბუნებაში დაცვა რომ ვერ შეძლო, მთავრობამ მათი აკვარიუმებში გადაყვანა გადაწყვიტა. 2017 წელს მექსიკაში მრავალმილიონიანი პროექტის, ვაკიტების დაცულ წყლებში გადაყვანის ორგანიზების მიზნით მეცნიერების და ვეტერინარების გუნდი შეიკრიბა. ჯგუფმა ორი მდედრი დაიჭირა, თუმცა სტრესის ნიშნების წარმოჩენისთანავე ორივე მათგანი გაათავისუფლეს. ერთ-ერთი მაშინვე დაიღუპა და პროექტიც შეჩერდა.

ველური ბუნების ბიოლოგის, მეთიუ პოდოლსკის თქმით, „ეს ვაკიტა კიდეც რომ გადარჩენილიყო, პრობლემა მაინც არ აღმოიფხვრებოდა.“ საზიზღარი ბრაკონიერებისთვის, ხარბი კარტელებისა და კორუმპირებული თანამდებობის პირებისთვის ტოტოაბას დაჭერა ვაკიტების დაცვაზე უფრო მნიშვნელოვანია. პოდოლსკი ერთ-ერთი რეჟისორია National Geographic-ის დოკუმენტური ფილმისა „აჩრდილების ზღვა“, რომელშიც ვაკიტების გადასარჩენად ჩატარებული გამოძებები და აქტივობებია ასახული. პოდოლსკის თქმით, რეაგირება „საფრთხის პირველივე ნიშნების“ შემჩნევისას უნდა მოხდეს და არა მაშინ, როდესაც კონკრეტული სახეობის მხოლოდ რამდენიმე წარმომადგენელიღა დარჩება.

National Geographic-ის ფილმი „აჩრდილების ზღვა“ ვაკიტების სავალალო მდგომარეობას ასახავს. მისი გამოწერა შესაძლებელია Amazon-ზე, Apple TV-სა და GooglePlay-ზე.