არ ესროლო! გადაიღე!

2006 წელი. National Geographic-ის ფოტოგრაფმა, ჯოელ სარტორემ, ბუნებაში გადაღებული ტრადიციული ფოტოების ნაცვლად, ტყვეობაში მყოფი ცხოველების პორტრეტების შექმნა მოისურვა. 

ასე დაიწყო სარტორეს და National Geographic-ის ერთობლივი პროექტი “ფოტოკიდობანი”. სარტორეს პროექტი 25-წლიანია. მიზანი – ტყვეობაში მყოფი რაც შეიძლება მეტი სახეობის ცხოველის ფოტოს გადაღებაა.

რატომ? იმიტომ, რომ 2100 წლისთვის ამ სახეობებიდან ბევრი შეიძლება გადაშენდეს. მის მიერ გადაღებული ზოგიერთი სახეობა, ალბათ, უკვე გადაშენდა კიდეც: თევზი Norturus crypticus ათწლეულზე მეტია, რაც ველურ ბუნებაში აღარ უნახავთ. არიან სხვებიც. მაგალითად, გადაშენებისთვის განწირული თეთრი მარტორქის ერთ-ერთი ქვესახეობა, რომლის მხოლოდ სამი ინდივიდიღაა დარჩენილი დღეს. 

სარტორე მთელ მსოფლიოში მოგზაურობს პორტრეტების გადასაღებად. ეს ყველაფერი ძალიან პრობლემატურია. ცხოველებს ხშირად არ სურთ თანამშრომლობა და გადაღებებზე წარმოუდგენელი ოდენობის დრო და ენერგია იხარჯება. ჩეხეთში, პლზენის ზოოპარკში, სარტორეს მარტორქის ვოლიერის თავზე ეძინა. ყველამ ვიცით, რომ, ზოგადად, მარტორქები თვინიერი ხასიათით არ გამოირჩევიან და მათი წყობიდან გამოყვანა დიდ სირთულეს არ წარმოადგენს. დაუპატიჟებელი სტუმრობით “გაცოფებული” მდედრი მარტორქა, სარტორეს თქით, მთელი ღამე ტყვიამფრქვევივით ურახუნებდა რქას გისოსებს, ხოლო შარდის სუნი სრულიად გაუსაძლისი იყო. ფასდაუდებელი ჯილდო მისი შესანიშნავი ფოტოა.

სარტორეს პორტრეტები იმდენად შთამბეჭდავია, რომ ვატიკანი და გაერო სიამოვნებით დათანხმდნენ, წმ. პეტრეს ბაზილიკის და გაეროს ნიუიორკის სათავო ოფისის შენობის ფასადებზე უზარმაზარი პროექციები მოეწყოთ. ღონისძიება მართლაც თვალისმომჭრელი იყო. 

ყველა აქამდე გადაღებული პორტრეტი, მოკლე ხანში, თავს მოიყრის ციფრულ ენციკლოპედიაში (nationalgeographic.com) და სურათები რეგულარულად დაიბეჭდება ჩვენს ჟურნალში. ახლა კი, აპრილის ნომერში გამოქვეყნებული საილუსტრაციო მასალით ისიამოვნეთ!