ბრძოლა გადარჩენისათვის
ამ უხვსა და ამავდროულად მწირ მიწაზე მორიგი ულუფის მოპოვება უმთავრესი ამოცანაა.
ბრძოლა გადარჩენისათვის
ამ უხვსა და ამავდროულად მწირ მიწაზე მორიგი ულუფის მოპოვება უმთავრესი ამოცანაა.
-
-
-
-
ბმული კოპირებულია
(მარცხნივ) „შესანიშნავმა ხუთეულმა“ გნუ მოინადირა – ერთმა წააქცია, დანარჩენები კი ძლიერად უჭერენ ყბებს და გუდავენ. ავაზები მუდმივად სადარაჯოზე არიან, რათა ლომებმა და აფთრებმა საზრდო არ მოსტაცონ.
(მარჯვნივ) ორბები გნუს ლეშით იკვებებიან. ეკოსისტემისთვის აუცილებელი ეს ფრინველები ნარჩენებს სხვა ლეშისმჭამელებზე სწრაფად ასუფთავებენ, რითაც დაავადებების გავრცელების რისკს ამცირებენ. ჯოგების მიგრაციას თან ახლავს მილიარდობით ბუზი, რომელიც ლეშით იკვებება და მასში კვერცხებს დებს.
მართალია, მანქანების გარემოცვაში გაიზარდნენ, მაგრამ დღენიადაგ მიჩერებულმა მაყურებელმა ამ ავაზების სისხარტეს ვერაფერი დააკლო.
(მარცხნივ) სერენგეტის ისედაც კომპლექსურ ეკოსისტემას ტურიზმი კიდევ უფრო ართულებს. იმ დღეს, როდესაც ფოტოგრაფმა ჩარლი ჰამილტონ ჯეიმსმა მასაი-მარაში ეს კადრი გადაიღო, სიახლოვეს 48 მანქანა დათვალა. სხვა დიდ კატისებრებთან შედარებით, ავაზა ადამიანებთან თვინიერი ქცევით გამოირჩევა, ამიტომ საფარის მანქანის ჩრდილში წამოგორებული ინდივიდი არცთუ ისე იშვიათი სანახაობაა.
(მარჯვნივ) როდესაც ავაზა მსხვერპლს მიზანში ამოიღებს, ნადირობა ჩვეულებრივ უცებ სრულდება – სიჩქარის აკრეფა ნულიდან 100 კმ/სთ-მდე სამ წამში შეუძლია. აქ ორი ავაზა ჯოგს ჩამოშორებულ გნუებს დაედევნა, თუმცა საბოლოო შედეგი გარანტირებული არაა. ნადირობისას ავაზა წარმატებას აღწევს 50%-ზე უფრო ნაკლებ შემთხვევაში, გნუ კი 80 კმ/სთ-მდე სიჩქარეს ავითარებს.
ჰაბიტატების შეზღუდვისა და კლიმატის ცვლილების ფონზე დიდ თუ პატარა ცხოველებს მყიფე ეკოსისტემაში გადარჩენა უფრო და უფრო უჭირთ.
(მარცხნივ) გამთენიისას ბეჰემოთები მასაი-მარას ერთ-ერთ მდინარეში ნებივრობენ. ისინი მდინარეებსა და გუბურებში დღეში 16 საათამდე ატარებენ; ძილითაც წყალში 10-30 ინდივიდს ერთად სძინავს, რათა ნაშიერები ნიანგებისგან დაიცვან. ღამით ძოვენ, 10 კილომეტრამდე მანძილს გადიან და დაახლოებით 40 კილოგრამ ბალახს მიირთმევენ. მათი ექსკრემენტი მდიდარია საკვები ნივთიერებებით და აფრიკის მდინარეებისა და მრავალი სახეობის სიჯანსაღეს უწყობს ხელს.
(მარჯვნივ) იმპალას როგორც მტაცებლებთან, ისე კონკურენტებთანაც უწევს გამკლავება. ახალგაზრდა მამრები ბრძოლაში გავარჯიშებას პატარაობიდან იწყებენ; მოგვიანებით ტერიტორიებს დარაჯობენ და მდედრების ჯგუფებს იცავენ. როდესაც ლომი, ლეოპარდი, ავაზა თუ აფთარი ედევნებათ, გაქცევისას მათი ნახტომი სიგრძეში 10, ხოლო სიმაღლეში – 3 მეტრს აღწევს.
