ბუხრინწა

ვინ:
33 წლის თავისუფალი ფოტოგრაფი ნიკოლოზ მესხი ქუთაისიდან, ამჟამად თბილისში ცხოვრობს. ეს მისი მეორე გამარჯვებაა კონკურსში yourshot საქართველო

სად:
თბილისის ზოოპარკის ორნითოლოგიის განყოფილება

რა:
Nikon D610 კამერა, nikkor 24-70-მილიმეტრიანი ლინზით 

ამბავი:
ფრინველისათვის პორტრეტის გადაღება სულაც არ არის ადვილი, თუნდაც ის დაბმული იყოს. ამ ფოტოს ავტორმა, ნიკოლოზ მესხმა დაიჭირა მომენტი, რომელიც არაჩვეულებრივად ასახავს ბუხრინწას დიდებულებას. ამ კადრის შემხედვარე ვხვდებით – სულაც არ არის აუცილებელი, ფრინველი ეგზოტიკური იყოს, მან ჩვენი აღფრთოვანება რომ გამოიწვიოს.

„რომელი ჯარისკაცი არ ოცნებობს გენერლობაზე? რა თქმა უნდა, მინდოდა კონკურსში გამარჯვება და ველოდი კიდეც“, – ამბობს ნიკა. ტექნიკა არ აძლევდა საშუალებას, ფრინველი ველურ ბუნებაში გადაეღო, ამიტომ, სპეციალურად კონკურსისთვის წავიდა ზოოპარკში, ააწყო სტუდია და ორნითოლოგიის განყოფილების თანამშრომლებთან ერთად, დაახლოებით, 3 საათი იმუშავა თავისი საყვარელი ფრინველის – ბუხრინწას პორტრეტის გადასაღებად: „ბუხრინწა ძალიან ლამაზია და სახე გულის ფორმის აქვს, რაც თავისებურ ეშხს სძენს, ამიტომ ის ჩემი საოცნებო ფრინველია. National Geographic-ის ფოტოგრაფობაზე კი მას შემდეგ ვოცნებობ, რაც პირველად დავიჭირე აპარატი ხელში“. 

შემოუერთდი National Geogrpahic საქართველოს Your Shot-ის საზოგადოებას და გააზიარე შენი კადრი yourshot.natgeo.ge