ჭამე, სვი და გაფრთხილდი

დიეტოლოგები დეტალურად სწავლობენ საკვების თვისებებს. ყველაფერი, რაც ამ გვერდზეა ნაჩვენები, ბოლო 25 წლის განმავლობაში 20-ზე მეტი კვლევის საგანი იყო. „ამ საკვებ პროდუქტებს ან მოულოდნელად აღმოაჩნდა დადებითი თვისებები, ან ფართოდ მოიხმარება, თუმცა საფრთხეს შეიცავს“, – ამბობს კლივლენდის კლინიკის ექიმი მაიკლ როიზენი.

ზოგი პროდუქტი კვებითი ღირებულების ნიშნით იძენს ხოლმე პოპულარობას – დიდწილად იმიტომ, რომ მათი მწარმოებელი ან დისტრიბუტორი დიდი კომპანიები აფინანსებენ კვლევებს. მარკეტინგმა შეიძლება მეცნიერება დაჩრდილოს. მაგალითად, რძის პროდუქტების მართლაც სასარგებლო თვისებების ხაზგასმის ფონზე, შეიძლება, მისი უარყოფითი ასპექტები უყურადღებოდ დარჩეს.

კარგად შესწავლილ პროდუქტებს – წითელ ღვინოსა და გაუფილტრავ ზეითუნის ზეთს, შეუძლია ხორცისა და რძის პროდუქტების უარყოფითი ზემოქმედების შემსუბუქება. თუმცა ალკოჰოლი სახიფათოა, ზეითუნის ზეთი კი – მეტად კალორიული.

როიზენის თქმით, ჯობს მეცნიერებას ენდოთ და არა სენსაციას. მიირთვით ბოსტნეული. ხორცის ნაცვლად, აირჩიეთ ორაგული ან ოკეანის კალმახი – სხვა სახეობებთან შედარებით, მათ უფრო მეტი სასარგებლო თევზის ცხიმი აქვთ. დალიეთ შავი ყავა, რომელიც ღვიძლისთვის სასარგებლოა. წაიხემსეთ თხილეულით, მაგრამ ზედმეტი არ მოგივიდეთ. დესერტად კი – ერთი ნატეხი შავი შოკოლადი.

თევზის ქონში არსებული დჰმ – ომეგა-3 ტიპის ცხიმოვანი მჟავა აზროვნების უნარს აუმჯობესებს.

კომბოსტოს კიბოსთან ბრძოლის თვისებებს გოგირდის მძაფრი შენაერთები ანიჭებს.

თხილეული სიმსივნის, გულის დაავადებებისა და ინფარქტის საფრთხეს ამცირებს.

სანელებლებს შეუძლია წნევის დარეგულირება. კურკუმამ შეიძლება ალცჰაიმერისგან დაგვიცვას.

ყვავილოვან კომბოსტოსა და სხვა ჯვაროსან ბოსტნეულს რაც მეტს მიიღებთ – მით უკეთესი.

ბროწეული და ბროწეულის წვენი დიდი რაოდენობით ანტიოქსიდანტებს შეიცავს, თუმცა პანაცეა არაა.

დღეში ერთი ჭიქა წითელი ღვინის დალევა ჯანსაღად ითვლება და სასარგებლოა გულისთვის.

ყველში არსებულმა ლეცითინმა შესაძლებელია, არტერიების ანთება გამოიწვიოს.

ბოკ-ჩოი სავსეა ანტიოქსიდანტებთა და მაგნიუმით, რომლებიც ხელს უწყობს მე-2 ტიპის დიაბეტთან ბრძოლას.

შავი ხორცი შეიცავს კარნიტინს, რომელმაც შეიძლება გულ-სისხლძარღვთა დისფუნქცია გამოიწვიოს.

შავი შოკოლადი სავსეა სხვადასხვა დაავადებასთან მებრძოლი ფლავონოიდებით და უმაღლეს შეფასებას იმსახურებს.