ცხოველების სამყაროში

ადამიანებს უყვართ ცხოველები, თუმცა, როგორც ირკვევა, ზოგი ამ სიყვარულს მათ შესწავლაში, მოვლასა და მათთვის საარსებო გარემოს გაუმჯობესებაში ავლენს, ზოგი კი ტურიზმის ინდუსტრიის მსხვერპლი ხდება და ძალაუნებურად წარმოუდგენელ ზიანს აყენებს ცხოველებს.

ამ ნომერში ჩვენი ავტორი, ბოღდანა ვაშჩენკო მოგითხრობთ შავი ზღვის დელფინების და ილიას სახელმწიფო უნივერსიტეტის პროექტის შესახებ, რომელსაც მეცნიერი ნათია კოპალიანი ხელმძღვანელობს. სტატიის კითხვისას თვალწინ წარმოგიდგებათ ზღვაში თავისუფლად მონავარდე ცელქი დელფინები და სამეცნიერო გუნდის დამოკიდებულება – ყოველგვარი შეწუხების გარეშე დააკვირდნენ მათ, თუმცა, სამწუხაროდ, იმის შესახებაც ბევრს გაიგებთ, თუ როგორ ეწირებიან დელფინები ხშირად ადამიანის მხრიდან გაუფრთხილებელ, გულგრილ მოპყრობას.

გაუფრთხილებლობა და გულგრილობა ერთია, სიყვარულით მიყენებული ძალაუნებური ზიანი კი – მეორე. სოციალური ქსელების განვითარება სულ უფრო და უფრო პოპულარულს ხდის ე.წ. „ველური ბუნების ტურიზმს“ – ის ხომ საშუალებას გვაძლევს, რამდენიმე წუთში მსოფლიოს ნებისმიერი წერტილიდან მოვაწონოთ თავი ნაცნობებს თუ უცნობებს ეგზოტიკურ ცხოველებთან ერთად გადაღებული ფოტოებით.

როგორც ირკვევა, ტურისტების ამ სიყვარულით ხშირად საკმაოდ უხეშად სარგებლობენ ველური ტურიზმის ბიზნესში ჩართული ადამიანები. National Geographic-ის კორესპონდენტებმა ნატაშა დეილიმ და კირსტენ ლუსმა ამ ნომერში ველური ტურიზმის ინდუსტრიის ის მხარე წარმოგვიდგინეს, რომელსაც აღფრთოვანებული ადამიანები ვერასოდეს ამჩნევენ. მათი მონათხრობი გულს მოგიკლავთ, სერიოზულად დაგაფიქრებთ ცხოველების ყოფაზე ტყვეობაში და იმაზე, თუ სად გადის ზღვარი ჩვენს სიამოვნებასა და მათ უფლებებს შორის.

გმადლობთ, რომ კითხულობთ National Geographic საქართველოს.