ცხოვრება ზღვარზე

კრის ჰემსუორთი არქტიკულ წყლებში ყვინთავდა, კანიონის თავზე დაკიდებულ თოკზე ძვრებოდა, ოთხი დღის განმავლობაში შიმშილობდა და საკუთარი სიკვდილისთვის ემზადებოდა – ამ ყველაფერს კი სიცოცხლის გასახანგრძლივებლად აკეთებდა.

National Geographic-ის დოკუმენტურ ფილმში, Limitless with Chris Hemsworth („უსაზღვრო“ კრის ჰემსუორთთან ერთად), რომელიც Disney+ ზე შეგიძლიათ იხილოთ, მსახიობი არ ეყრდნობა ათწლეულის განმავლობაში თორის როლის შესრულებით დახვეწილ ფიზიკურ მონაცემებს. იგი ცდის გონებას და სხეულს იმ ჩვევების გამოსამუშავებლად, რომლებიც სიცოცხლეს ახანგრძლივებს.

ჰემსუორთის თქმით, ამ პროექტამდე ყოველთვის სპეციალურად ფილმისთვის ვარჯიშობდა, სადაც მიზანი შეიძლება ყოფილიყო „მუცლის კუნთების ქონა. ეს უფრო ზედაპირულად ხდებოდა. თავს ყოველთვის უკეთ ვგრძნობდი, თუმცა მეცნიერულად დადასტურებულ მტკიცებულებებში ჩაღრმავება, თუ რატომ ვგრძნობდი თავს უკეთესად, სიახლე იყო“, – მიამბობს მსახიობი.

Limitless-ის დასრულებას, პანდემიის და ჰემსუორთის ფილმების გამო შეწყვეტილი გადაღებების გათვალისწინებით, ორ წელზე მეტი დასჭირდა. სერიალი ეფუძნება 2006 წლის ფილმს The Fountain, რომლის სცენარიც პროდიუსერებმა დარენ არონოფსკიმ და არი ჰენდელმა დაწერეს. ფილმი მოგვითხრობს კაცის შესახებ, რომელიც მარადიულ ახალგაზრდობას ესწრაფვის.

საპროდიუსერო კომპანია Nutopia-სთან ერთად ჯგუფმა გადაწყვიტა შეექმნა საინტერესო და თან გასართობი სერიალი დღეგრძელობის შესახებ. Nutopia-ს აღმასრულებელი პროდიუსერი ჯეინ რუტი ამბობს, რომ ეს სიცოცხლის გახანგრძლივების ნაკლებად მეცნიერულ-ფანტასტიკური ხედვაა.

ნორვეგიაში, სხეულზე ექსტრემალური ტემპერატურის ეფექტების შესასწავლად, ჰემსუორთმა ფიორდის 2-გრადუსიან წყალში იცურა. არონოფსკიმ თქვა, რომ ეს იყო „გასაოცარი გამოცდილება, გენახათ კრისი, რომელიც თავისი შესაძლებლობების ზღვრამდე მიდის“.

ასეთი დატვირთვა განსაკუთრებულ მუხტს მოითხოვს, ამბობს ჰემსუორთის მწვრთნელი როს ეჯლი. იგი სპორტის მეცნიერი და ერთადერთი ადამიანია, რომელმაც დიდ ბრიტანეთს ცურვით შემოუარა. ეჯლი ასევე დაეხმარა ჰემსუორთს მომზადებაში ფილმისთვის Thor: Love and Thunder. „საზოგადოება იცნობს კრისს, როგორც მსახიობს, თუმცა ბევრი არ იცნობს მას, როგორც სპორტსმენს“, – ამბობს ეჯლი.

Limitless-ში ჰემსუორთი ოთხდღიანი შიმშილის დროს წყალქვეშა ჰოკეის თამაშობს, რაც ტესტის ნაწილია შიმშილობის პოტენციური სარგებლის შესაფასებლად. მსახიობი მსუბუქ განწყობას ინარჩუნებს, თუმცა არის მძიმე მომენტებიც. პროფილაქტიკური მკურნალი ექიმი პიტერ ატია ატყობინებს იმ დროს 37 წლის ჰემსუორთს, რომ გენეტიკური მახასიათებლების გამო მას აქვს ჩვეულებრივზე 10-ჯერ მეტი შანსი ალცჰაიმერის დაავადების გასავითარებლად. ყოველდღიურმა ვარჯიშმა, გამოძინებამ და სტრესის დაქვეითებამ შეიძლება შეამციროს ამის ალბათობა, დასძენს ატია.

„თავიდან საკმაოდ შემეშინდა, – ამბობს ჰემსუორთი, – მაგრამ ახლა ამ ინფორმაციის გამო შესაძლებელია გაცილებით  უკეთესი ცხოვრებით ვიცხოვრო“.

ფინალური სცენები – ეპიზოდი რეალობასთან და სიკვდილთან შეგუებაზე, გვიყალიბებს წარმოდგენას, თუ რატომ ვესწრაფვით უფრო დიდხანს სიცოცხლეს.

რამდენიმე წამით ჰემსუორთი განიცდის სიბერის მომენტებს. მას აცვია კოსტიუმი, რომელიც მატებს წონას და ზღუდავს მოძრაობას, სმენას და მხედველობას და შეაგრძნობინებს მდგომარეობას, რომელიც მსახიობს დაახლოებით 80 წლის ასაკში დაეუფლება. ის უსმენს სიკვდილთან ახლოს მყოფ ადამიანებს და აანალიზებს, რა არის მნიშვნელოვანი. მსახიობი მიჰყავთ ხანდაზმული ქალისკენ, რომელიც მასთან ზურგით ზის და როგორც კი იგი მას მხარზე ეხება, ცნობს თავის ცოლს, ელზა პატაკის დამაბერებელი მაკიაჟით. ელზა მისკენ ბრუნდება და ისინი ერთმანეთს ეხვევიან.

შოუს შემქმნელ ჯგუფს არ გაუფრთხილებია ჰემსუორთი ამ შეხვედრის შესახებ. მათ მისი გულწრფელი რეაქციის აღბეჭვდვა სურდათ. უეცრად იგი ცდილობს შეეგუოს აზრს, რომ სიცოცხლის დასასრულს უახლოვდება. და, ამგვარად, უკვე ცხადი ხდება, თუ რატომ ღვრის ოფლს, იყინება და შიმშილობს. ამ ყველაფრის მიზეზი სიყვარულია?

„ზუსტად“ – ამბობს მოღიმარი ჰემსუორთი – „ერთ-ერთი პირველი შეკითხვა, რომელიც პიტერ ატიასგან მივიღე, იყო, თუ როგორი იქნება შენი ცხოვრება 20-30 წლის შემდეგ? როგორი იქნება შენი სიკვდილი?“

ჰემსუორთი პაუზას აკეთებს. შემდეგ კი ამბობს: „ჩემთვის კარგი სიკვდილი სავსე ცხოვრებით ცხოვრება იქნებოდა“.

უყურეთ Limitless-ს კრის ჰემსუორთთან ერთად, National Geographic-ის ექვსნაწილიან სერიალს, რომელიც გადის Disney+-ზე.

ჟურნალისტი ჟაკლინ კატლერი რეგულარულად აშუქებს ტელევიზიას. მანამდე მან იმუშავა Nat Geo-ს სერიალზე – Welcome to Earth.