COVID-19-ის პანდემია

National Geographic-ის პირველი გამოცემა 1888 წლის ოქტომბერში დაიბეჭდა. ცხადია, მაშინდელი ჟურნალი სადა, ყავისფერი ყდითა და 98-გვერდიანი ტექსტით, რომელსაც ერთი ფოტოც კი არ ახლდა, დღევანდლისგან სრულიად განსხვავდებოდა, თუმცა ორი რამ უცვლელი დარჩა – ჩვენ ყოველთვის მოგითხრობდით და მოგითხრობთ სამეცნიერო სიახლეებისა და გარემოს შესახებ.

არც National Geographic-ის ივლისის ნომერია გამონაკლისი. ამ სპეციალურ გამოცემაში ჩვენ მოგიყვებით იმის შესახებ, თუ რა გავლენას ახდენს კლიმატის ცვლილება დედამიწის უმაღლეს მწვერვალზე, როგორ ცდილობენ მეცნიერები, თანამედროვე ტექნოლოგიების საშუალებით მიიღონ მაქსიმალურად ზუსტი ინფორმაცია ამინდის შესახებ და როგორ ცდილობენ ადამიანები, რომელთა საარსებო გარემო ოდითგან ჰიმალაის მთათა სისტემასთან იყო და არის გადაჯაჭვული, ახალ პრობლემებთან გამკლავებას.

ევერესტთან დაკავშირებული სტატიების გარდა, ამ გამოცემაში გთავაზობთ სპეციალურ რეპორტაჟსაც COVID-19-ის შესახებ. შევეცდებით, მოგითხროთ იმის შესახებ, თუ რა გავლენა იქონია ვირუსმა ჩვენს ცხოვრებაზე: ჯანმრთელობიდან დაწყებული, ჩვენი სამსახურებითა და ურთიერთობებით დამთავრებული. დედამიწის უმაღლესი მწვერვალიც კი არ დარჩა ვირუსის გავლენის მიღმა – მარტში ევერესტი თითქმის ყველა ალპინისტისთვის ჩაკეტეს.

COVID-19-მა კარგად დაგვანახა, თუ რამდენად პატარაა ჩვენი პლანეტა, რამდენად გადაჯაჭვულები ვართ ერთმანეთზე და რამდენად აუცილებელია დედამიწისა და მისი ბინადრების დასაცავად ერთად მუშაობა.

ვირუსით გამოწვეულ გაურკვევლობასთან გამკლავება არ არის ადვილი, თუმცა, მიუხედავად პანდემიისა, ჩვენ კვლავ გავაგრძელებთ მეცნიერებაზე დაფუძნებულ თხრობას და მოვლენათა ეპიცენტრში განსაკუთრებული ფოტოების გადაღებას.

წელს National Geographic-ი 132 წლის ხდება, თუმცა ჩვენი ყვითელი ჩარჩო ისევ იმას ნიშნავს, რასაც ყოველთვის – ჩვენ გვჯერა, რომ მეცნიერების, კვლევისა და თხრობის ძალას სამყაროს შეცვლა შეუძლია, რაც თქვენი მხარდაჭერის გარეშე არ გამოგვივა.

გმადლობთ, რომ კითხულობთ National Geographic საქართველოს.