დახმარება ფარაონთა მიწიდან

გამომძიებლებს, დანაშაულის ადგილის შესწავლისას, შესაძლოა, თვით ფარაონები დაეხმარონ. ახალი კვლევის თანახმად, პიგმენტი სახელად „ეგვიპტური ლურჯი“, შეიძლება, რთულ ზედაპირზე თითის ანაბეჭდების აღმოჩენის საუკეთესო საშუალებად იქცეს.

უძველესი სინთეტიკური საღებავი ქანდაკებებზე, სარკოფაგებსა და სამარხების კედლებზეა შემორჩენილი. დიდი ხანია მეცნიერები დაინტერესდნენ და გამოიკვლიეს ამ გამძლე ნივთიერების ქიმიური შემადგენლობა, რომელიც გარკვეული სინათლის პირობებში, ინფრაწითელ გამოსხივებას გამოსცემს. დანაშაულის ადგილზე პოლიციელები ზედაპირს კონტრასტული ფერის ფხვნილს აყრიან. ფხვნილი ანაბეჭდებს ეკრობა, რაც უტყუარი სამხილია, რომ იქ ადამიანი იმყოფებოდა. მბზინავი და ჭრელი ზედაპირიდან ანაბეჭდის ნიმუშის აღება რთულია. სწორედ ასეთი შემთხვევებისთვისაა „ეგვიპტური ლურჯი“.

ამ პიგმენტის გამოყენების შემდეგ, ზედაპირს თეთრ შუქს ანათებენ და სპეციალურ პირობებში აღბეჭდავენ ფირზე. ფოტოზე ანაბეჭდი მკვეთრად ანათებს.

„ერთ-ერთი კომპანია უკვე გვთავაზობს ამ ფხვნილს“, ამბობს ავსტრალიელი ქიმიკოსი საიმონ ლევისი. „ვფიქრობთ, მალე მას ექსპერტიზის ჩატარებისას გამოვიყენებთ“.