დაუმარცხებელი ხოჭოები

ჩრდილოეთი ამერიკის ყველაზე დიდი ლეშიჭამია მწერები, ამერიკული მესაფლავე ხოჭოები, ჩვეულებრივ პატარა მღრღნელებითა და ფრინველებით იკვებებიან. ისინი ხშირად წყვილებად მუშაობენ, რათა სუნით მიაგნონ ლეშს, მოაშორონ მას ბეწვი ან ბუმბულები, მიწაში ჩაფლან და საკვების დიდი ხნით შესანახად დაფარონ ორალური და ანალური სეკრეტით. იანვარში მეცნიერებმა ამ მეღამური მწერის შესახებ, რომელსაც 1989 წლიდან გადაშენების საფრთხის წინაშე მყოფი სახეობების კანონი იცავს, განსაცვიფრებელი სიახლე გვაუწყეს: ისინი უცნაურად გამძლენი არიან ნეონიკოტინოიდი ინსექტიციდების მიმართ.

მიუხედავად იმისა, რომ ზემოქმედების შემდეგ მკვდრებს ჰგვანან, მრავალი მათგანი 24 საათის განმავლობაში ჯანმრთელდება, რაც დეტოქსიკაციის საოცარი უნარის მაჩვენებელია. მეცნიერთა გუნდი ვარაუდობს, რომ გახრწნილ ცხოველთა ბაქტერიებთან და სოკოებთან შეხება ხოჭოებს ამტანობას მატებს. ახლა ისინი იკვლევენ ხოჭოებს და მათ გამოყოფილ ნივთიერებებს ადამიანებისთვის პოტენციური სარგებლის მოტანის მიზნით, რაც ახალ ანტიბიოტიკებსა თუ საკვების კონსერვანტებს მოიცავს.

National Geographic Society აფინანსებს მკვლევარ ჯოელ სარტორეს „ფოტოკიდობნის“ პროექტს, რომლის მიზანია მსოფლიოს ზოოპარკებში, აკვარიუმებსა და ნაკრძალებში მცხოვრები ყველა სახეობის დოკუმენტირება.