რიცხვები:

200 წელი – ამ ხიდის სავარაუდო ასაკი

11 500 მმ – ჯამური ნალექი შტატში 2016 წელს

6460 – სოფლების დაახლოებითი რიცხვი შტატში

ინდოეთის შტატ მეგჰალაიაში, რომელიც ერთ-ერთი ყველაზე ტენიანი ადგილია დედამიწაზე, სოფლის მოსახლეები კაუჩუკის ხის ფესვებისგან მყარ საფეხმავლო ხიდებს წნიან. ამ ტრადიციის გადასაღებად პრასინჯიტ იადავმა ერთი წლის განმავლობაში ოცდაათამდე ფესვისგან დაწნული ხიდი გადაიღო.

„მინდოდა ისე გამომეჩინა, თითქოს ეს ხიდები ბეჭდების მბრძანებლიდან იყო და მერე მეთქვა, რომ ისინი ნამდვილად არსებობდა“.
— პრასინჯიტ იადავი

რამდენიმე თვით ადრე
როგორ გადავიღოთ კადრი:
იადავს ამ პროექტზე მუშაობამდე არასოდეს ენახა ცოცხალი ფესვებისგან დაწნული ხიდი, მაგრამ იცოდა, რომ სოფელ ნოჰვეტთან ის ნამდვილად იყო. იადავს სურდა, თავისი ფოტო სხვა ტურისტების ფოტოებისგან გამორჩეული ყოფილიყო. „რთულია, მცენარე ქარიზმატულად გამოაჩინო“, – ამბობს იგი. მოსამზადებლად სხვა ფოტოგრაფებთან გაიარა კონსულტაციები და პეიზაჟები შეისწავლა. გადაწყვიტა, ფოტო დაღამების შემდეგ გადაეღო. ეს სარისკო იყო: მოულოდნელმა ღრუბლებმა შეიძლება ნიაღვრები გამოიწვიოს, რომლებიც განსაკუთრებით საშიშია ღამით.

ორი კვირით ადრე
წასაღები ნივთების სია:
იადავი მეოთხეჯერ მიემგზავრებოდა ამ რეგიონში და უკვე იცოდა, რაც უნდა წაეღო: მხოლოდ აუცილებელი საკვები, ტანსაცმელი წვიმისაგან დასაცავად, პრიორიტეტი კი ფოტოაპარატის სიმშრალეს მიანიჭა.
• ქოლგები კამერის აღჭურვილობის დასაფარად
• გრანოლას შოკოლადები
• ფოტონათების ხელსაწყო და შუქდიოდის პანელი
• თავზე დასამაგრებელი ძლიერი ფარანი
• რეზინის ბუდე კამერის დასაცავად
• შტატივი
• შავი ფირი ლინზის დასაცავად
• სინათლის მოდიფიკატორები

სტარტი
სინათლით “ხატვა“
იადავი ბანგალორიდან, სადაც ის ცხოვრობს, გუვაჰატიში გადაფრინდა, იქიდან კი ტაქსით გაემგზავრა ნოჰვეტში. ნოჰვეტიდან ხიდამდე 30 წუთი ფეხით იარა. ხიდისა და ირგვლივ ბუნების „ჩასახატად“ იადავი სამი კვირის განმავლობაში ატარებდა ექსპერიმენტებს, რისთვისაც სხვადასხვა განათებასა თუ ხანგრძლივ ექსპოზიციას იყენებდა. 438 წამის განმავლობაში, რაც ამ ფოტოს გადაღებას დასჭირდა, იადავი სხვადასხვა წერტილიდან ანათებდა შუქს. სიბნელეში გახვეული იადავი არც კი ჩანს ბოლო ფოტოზე.