ძილი ნებისა

კონგოს დემოკრატიულ რესპუბლიკაში, ლვიროს პრიმატების სარეაბილიტაციო ცენტრის მომვლელი მირეი მიდერჰო ოზიბა ბრაკონიერებისგან დახსნილ მძინარე ჩვილ შიმპანზეებს დაჰყურებს. სიმშვიდის ეს წუთები მოულოდნელი ბედნიერი დასასრულია სიკვდილს გადარჩენილი ორი შიმპანზისათვის. 

ეს ბრენტ სტირტონის საყვარელი კადრია: „პატარა შიმპანზეები ამ დროს ჯერ კიდევ ეჩვეოდნენ ახალ თავშესაფარს. დედისა და მთელი ოჯახის დახოცვის შემსწრე, ტრავმირებული ცხოველები მონადირეებმა ყუთში დაამწყვდიეს და გაყიდვას უპირებდნენ. მაშველების მიერ გადარჩენილი ორივე პრიმატი საკვების უკმარისობით და ავადმყოფობით იყო დაუძლურებული. ვუყურებდი, როგორ აძინებდა მირეი მათ თავის ცარიელ საძინებელში. უდიდესი ნდობაა საჭირო, რომ ტრავმირებულმა ცხოველმა – მით უმეტეს ისეთმა გონიერმა, როგორიც შიმპანზეა – ადამიანთან თავი კომფორტულად იგრძნოს. სწორედ ეს ჩანს ამ ფოტოზე: ნდობა“.   ფოტოგრაფი დაუმეგობრდა კონსერვაციის რამდენიმე ბინადარს – შიმპანზეებს, რომლებსაც იქ უკვე საკმაო დრო ჰქონდათ გატარებული და ადამიანებთან თავს ისე კომფორტულად გრძნობდნენ, რომ მკლავებში უხტებოდნენ. „თავის პაწაწინა ხელს რომ ჩამკიდებდნენ, ზუსტად ისეთი გრძნობა მეუფლებოდა, როგორიც ჩემი პატარა ვაჟის ხელის ჩაკიდებისას“, – ამბობს იგი. „ეს პატარა შიმპანზეები თავისი აშკარად გონიერი თვალებით რომ ამოგხედავენ, ხვდები, რომ შენ წინ არის არა „რაღაც“, არამედ „ვიღაც“, ვინც დიდი ტრაგედია გადაიტანა – მთელი ოჯახი დაკარგა, ახლა კი აცნობიერებს, რომ ლვიროში ახალი შეიძინა“.