გაიცანით ახალი მთავარი რედაქტორი

ბავშვობაში გაუმაძღარი მკითხველი ვიყავი. ხან კომეტები მიტაცებდა, ხან ვეშაპები, შემდეგ – ჰერკულანუმი, ტექტონიკური ფილები თუ სენეგალი. ჩემთვის განსაკუთრებით საინტერესო საკითხის აღმოჩენის შემდეგ ბიბლიოთეკაში მივეშურებოდი, რათა მასზე უფრო მეტი გამეგო.

ბებიაჩემმა, რომელმაც დაუოკებელი ცნობისმოყვარეობა გამიღვივა, ჩვენი ოჯახისთვის National Geographic-ი გამოიწერა. ხშირად ჩემი ახალი აჩემების წყარო ხდებოდა სტატია, რომელიც ჩემთვის უცნობ თემას ეხებოდა.

როდესაც გავიზარდე, ჩვენი გასაოცარი სამყაროს შეცნობაში კვლავ National Geographic-ი დამეხმარა. მის ფურცლებზე ამოკითხულმა ინფორმაციამ ჩვენი პლანეტა უფრო სრულად დამანახა. სიდიადე, გამოწვევები და, რაც მთავარია, ადამიანების, ადგილების და საგნების ამაღელვებელი მრავალფეროვნება.

National Geographic-მა ასევე შთამაგონა, თავად გავმხდარიყავი მკვლევარი. ამან არა მარტო გაამდიდრა ჩემი ცოდნა, არამედ გამიმძაფრა ჩვენი პლანეტის დაცვისა და შენარჩუნების აუცილებლობის შეგრძნება.

ამ გამოცემაში პირველად წარვდექი თქვენ წინაშე National Geographic-ის მთავარი რედაქტორის ამპლუაში, თუმცა ჩვენმა წარმოუდგენლად ნიჭიერმა გუნდმა ნომერი ჩემს მოსვლამდე თითქმის სრულად ააწყო. როგორც მკითხველი, რეკომენდაციას გავუწევ ჩვენს მომაჯადოებელ მთავარ სტატიას „ამერიკა სხვა თვალით“, რომელიც ამერიკის ბუნების დაცვის მიღწევებზე მოგვითხრობს.

მახარებს, რომ აქ თავის წარდგენის საშუალება მეძლევა. ჩემთვის პატივია ასოცირება ორგანიზაციასთან, რომელმაც ძლიერი გავლენა იქონია ჩემს ცხოვრებაზე. მომდევნო თვეებში National Geographic-ის სამომავლო გეგმებზე ვაპირებთ მუშაობას, რათა ჟურნალმა შეინარჩუნოს ავტორიტეტულობა და მნიშვნელობა, რომელიც ყოველთვის ჰქონდა. წინ საინტერესო მოგზაურობა გველის, რომელშიც ვიმედოვნებ ერთად გავეშურებით.