გაიცანით ნემსით შეიარაღებული ჰერმაფროდიტი ზღვის ლოქორა

წყნარი ოკეანის წყლების ბინადარი ზღვის ლოქორა, Siphopteron makisig, სარკისებრად წყვილდება.

ბოლოლაყუჩიანების სხვა სახეობების მსგავსად, S. makisig-იც ორივე სქესის რეპროდუქციული ორგანოთია დაჯილდოებული და შეწყვილებისას ორივეს ერთდროულად იყენებს, თუმცა, სხვებისგან განსხვავებით, პაემანს უჩვეულო, დამიზნებული ჩხვლეტით ასრულებს.

ლოქორის პენისს ორი დაბოლოება აქვს: ერთი, რომელიც მდედრობით ორგანოებში არსებულ კვერცხებს სპერმით ანაყოფიერებს, ხოლო მეორე, შპრიცის მსგავსი წვეტის მქონე. სქესობრივი აქტის დროს ლოქორები ერთმანეთს პენისის წვეტიანი ნაწილით ჩხვლეტენ და, სავარაუდოდ, ჰორმონების შემცველ სითხეს აწვდიან. ევოლუციური ბიოლოგის, როლანდა ლანგის აზრით, სითხე, სავარაუდოდ, „ლოქორის სპერმის ნაყოფიერებას აუმჯობესებს ან წინა პარტნიორების მიერ მიწოდებულ სპერმას აკავებს“. სხვა ცხოველები სქესობრივი აქტის დროს პარტნიორებს სხეულის სხვადასხვა ნაწილში ჩხვლეტენ (ტრავმატული ინსემინაცია), თუმცა ლანგის თანაავტორობით გამოქვეყნებული კვლევის მიხედვით, S. makisig-ის ქცევა „პირველი ცნობილი შემთხვევაა“, როდესაც ცხოველი პარტნიორს თვალებს შორის ჩხვლეტს – სავარაუდოდ, ცენტრალურ ნერვულ სისტემაზე უკეთესი ზემოქმედების მოსახდენად.

უცნაური დაწყვილება

Siphopteron makisig-ს მდედრობითი გენიტალიები და ორდაბოლოებიანი პენისი ერთდროულად აქვს.

სქესობრივი აქტის დროს გადაჭდობილები, მდედრობით გენიტალიაში ერთმანეთს სპერმას პენისებით აწვდიან.

შემდეგ ერთმანეთს შუბლში წვეტით ჩხვლეტენ, რითიც, სავარაუდოდ, ნერვულ სისტემაზე მოქმედი სითხე შეჰყავთ.

აღწერა
ზღვის მუცელფეხიანი S. makisig დაახლოებით ნახევარი სანტიმეტრის სიგრძისაა, გამჭვირვალე, სხეულზე არსებული ყვითელი და წითელი ლაქებით. (სილურჯე ფონზე არსებული წყლის ფერია)
ჰაბიტატი
წყლის ლოქორა ოკეანის ქვიშიან ფსკერზე, დაახლოებით 6-27 მეტრის სიღრმეზე ბინადრობს და, ჩვეულებრივ, მიკროწყალმცენარეთა ფორმირებებში ბუდობს.
არეალი
ეს მოლუსკი ფილიპინების, ავსტრალიის და ინდონეზიის წყლებშია ამოცნობილი.