გზავნილები მეცნიერებისა და ინოვაციის მოწინავე ხაზიდან

კანზას-სიტიში ყველაფერი თანამედროვეა

ოდესღაც კანზას-სიტიში, აშშ-ის მასშტაბით, ტრამვაის ყველაზე გამართული სისტემა იყო. 2016 წელს, მისი გაუქმებიდან 59 წლის თავზე, გზებზე ტრამვაის ახალი ინკარნაცია გამოჩნდა, რომელშიც მთავარ როლს ჭკვიანი ტექნოლოგია თამაშობს. პირველ 2,5 წელიწადში ახალმა ტრამვაიმ 5 მილიონზე მეტი უფასო რეისი შეასრულა. 3,5-კილომეტრიანი საწყისი ხაზის გაგრძელება უკვე შენდება.

ტრამვაის ხაზის გასწვრივ განლაგებული ციფრული ჯიხურები ადგილობრივ ღირსშესანიშნაობებს აჩვენებენ, იღებენ ვიზიტორების ფოტოებს და ზომავენ ჰაერის ხარისხს. შუქნიშნებმა ტრამვაის გზის გაყოლებაზე სატრანსპორტო საშუალებების მგზავრობის დრო, საშუალოდ, 36 წამით შეამცირა, რაც სათბურის აირების გამოყოფას ამცირებს. ქალაქმა ასევე გამოიყენა სენსორების მიერ შუქნიშნებზე შეგროვებული მონაცემები იმის განსასაზღვრად, თუ სად გაჩნდება ორმოები. – ლიზა როდრიგესი

ინსპექტორი რობოტი

ყოველწლიურად მსოფლიოს ქალაქების წყალმომარაგების 20-30% წყლის გაჟონვის შედეგად იკარგება. „ბევრ ქალაქში ისიც კი არ ვიცით, სად არის მილები“, ამბობს იუ ვუ, Watch Tower Robotics-იდან. მასაჩუსეტსის ტექნოლოგიურ ინსტიტუტში სტუდენტობის პერიოდში ვუმ ბადმინტონის ვოლანის ფორმის რბილი რობოტი გამოიგონა, რომელიც წყალგაყვანილობის სისტემაში ჩაგდებისას ბზარების ადგილებს აღნუსხავს. „რა იქნება შემდეგი ნაბიჯი? რობოტი გაჟონვების არა მარტო პოვნას, არამედ შეკეთებასაც შეძლებს“, ამბობს ვუ. – კრისტინ რომი

დრონები ქალაქებისთვის

2022 წლისთვის აშშ-ის ცაზე შეიძლება კომერციული დრონების რაოდენობა გაოთხმაგდეს. დრონების გამოყენება შესაძლებელია ურბანული ჰაბიტატის მენეჯმენტის, ტვირთის გადაზიდვისა და შენობების ინსპექციისთვის, მაგრამ შეგროვებული მონაცემები შეიძლება ჰაკერებისთვის მარტივი ნადავლი გახდეს. – რეიჩელ ბრაუნი

კოპენჰაგენის ენერგიის მთა

სადაც ნაგავი იწვის და თოვლის კორიანტელი დგება

ვაკე რელიეფის გამო კოპენჰაგენი სათხილამურო კურორტად არ აღიქმება. ახალი პროექტი „კოპენჰილი“ დასვენებისა და განახლებადი ენერგიის დაწყვილებას ისახავს მიზნად. კოპენჰილი ქალაქის ინდუსტრიულ სანაპიროზე განლაგებული მასიური ქარხანაა, რომელიც ნარჩენებს ელექტრობად და სითბოდ გარდაქმნის. ქარხნის დახრილი, 380-მეტრიანი სახურავი ისე გამოიყურება, თითქოს სათხილამუროდ იყოს შექმნილი და ის მართლაც ამისათვის გაკეთდა. ახალ შენობას ურბანული სათხილამურო პარკი, საცოცი კედელი და პანორამული კაფე ექნება.

ქარხანა წინაზე 25%-ით უფრო პროდუქტიულია და ნახშირორჟანგის ემისიას დააკავებს, რაც შეესაბამება დანიის მიზანს, 2050 წლისთვის გახდეს ნახშირორჟანგის ნეიტრალური მაჩვენებლის მქონე ქვეყანა. ნარჩენების დაწვის იდეას კრიტიკოსებიც ჰყავს, რომლებიც ამბობენ, რომ ნარჩენების ენერგიად გადამამუშავებელი ქარხნები ჭარბნარჩენიან კონსუმერიზმს უწყობს ხელს, მაგრამ 2018 წელს კოპენჰილმა, დაახლოებით, 450 ტონა ნარჩენი გადაამუშავა. ეს ბევრად სჯობს ნაგავსაყრელების გავსებას, რომლებიც მეთანის წყაროა. – კრისტინა ნუნესი

ახალი ხერხი ქალაქის წყლის სისუფთავის შესანარჩუნებლად

ზოგიერთი აქტინია საცეცებს საკვების დასაჭერად იგრძელებს, სხვა დროს კი კუმშავს. მეცნიერებმა, რომლებიც წყლის გაწმენდის გამარტივებულ საშუალებებს ეძებენ, ფორმის ცვლილების ეს შესაძლებლობა შთაგონების წყაროდ გამოიყენეს ახალი ნანოკოაგულანტის შექმნისას. ნანოკოაგულანტის წყალში გარევისას მისი ბირთვი შიშვლდება და რეაქციაში შედის ისეთ არასასურველ ქიმიურ ნივთიერებებთან, როგორებიცაა ნიტრატები და წყლის დამაბინძურებლები. მისი გარსი ნაწილაკების ერთად მოგროვებასა და ძირზე დალექვას იწვევს. – დაგლას მეინი

საკვები ნარჩენები

რუსეთში, სამარის სახელმწიფო ტექნოლოგიური ინსტიტუტის მკვლევრებმა ხილისა და ბოსტნეულის პიურესგან ჭიქები შექმნეს. ბუნებრივი ჭურჭელი, რომელსაც ფორმას პლასტიფიკატორის საშუალებით აძლევენ, იმდენად გამძლეა, რომ მასში ადუღებული წყლის ჩასხმაც შეიძლება. პროექტის მიზანი თავდაპირველად ასტრონავტების საკვების შეფუთვების ნარჩენების შემცირება იყო, მაგრამ ასეთი ჭურჭელი გამოსადეგი დამატება იქნება იმ ქალაქების სამზარეულოებისა და ნებისმიერი სხვა ადგილისთვის, რომლებიც ნაგავსაყრელების შემცირებას ცდილობენ. – ბეკი დევისი