გზავნილები მეცნიერებისა და ინოვაციის მოწინავე ხაზიდან

წარსულში გასეირნება ვულკანის ჩრდილქვეშ

ვულკან ოლ-დოინიო-ლენგაიდან, რომელიც „ღმერთის მთას“ ნიშნავს, დაახლოებით თოთხმეტ კილომეტრში, National Geographic Society-ს დაფინანსებით მეცნიერებმა უნიკალური აღმოჩენა გააკეთეს: 400-ზე მეტი განამარხებული ნაკვალევი, რომელიც 10 000-19 000 წლის წინანდელი ადამიანების სიარულის ან სირბილისგან მიწის ზედაპირზე შემორჩა. ნაკვალევი ტანზანიის სოფლის მცხოვრებმა კონგო საკაემ აღმოაჩინა. ენგარე-სეროს არქეოლოგიური ველი მეცნიერებს საშუალებას აძლევს, „დაინახონ Homo sapiens-ის წინაპრების ქცევითი თავისებურებები“, – ამბობს სინთია ლიუტკუს-პირსი, გეოლოგი აპალაჩის სახელმწიფო უნივერსიტეტიდან.

ნაკვალევის ერთ-ერთი მონაკვეთი ავლენს 17 ადამიანს, მათგან, სავარაუდოდ, 14 ქალს, რომლებიც სამხრეთ-დასავლეთისკენ მიემართებოდნენ. როგორც ფიქრობენ, ეს იყო ეს მიუთითებს იმაზე, რომ საკვების მომპოვებელ ჯგუფს ქალები ხელმძღვანელობდნენ; ასეთი შრომის დანაწილება თანამედროვე მონადირე-შემგროვებლებშიც გვხვდება. ენგარე-სეროს ნაკვალევის ეროზიისგან დასაცავად მეცნიერებმა ტერიტორიის 3D-სკანირება გააკეთეს და ადგილობრივ ხელისუფლებასთან თანამშრომლობით მის შემოღობვას და ბაზის აშენებას გეგმავენ. მანამდე კი საკაე მეთვალყურეობს თავის აღმოჩენას. – მაიკლ გრეშკო

ეს მომთაბარე ჭიანჭველები ზურგით ხოჭოებს დაატარებენ

როდესაც ასიათასობით მომთაბარე ჭიანჭველა სალაშქროდ მიემართება, მათთან არიან სიმბიონტებიც – ორგანიზმები, რომლებიც მათი რესურსებით სარგებლობენ. ერთი ასეთი ორგანიზმი კოსტა-რიკაში იპოვეს. ის ჭიანჭველის ზურგზე შენიღბულად მგზავრობდა და ზურგზე ყბებით ჩაბღაუჭებული ჭიანჭველის მეორე უკანა ტანივით გამოიყურებოდა. – პატრისია ედმონდსი

ფლამინგოებს მეგობრობა შეუძლიათ

ფრინველთა სამყაროს ვარდისფერბუმბულიან სიმბოლოებს, როგორც მეცნიერებმა აღმოაჩინეს, ერთგული და ხანგრძლივი მეგობრობა შეძლებიათ. მათი ურთიერთობები სხვადასხვანაირია: წყვილები ყოველ წელს ბუდეს აშენებენ და თავიანთ ნაშიერებს ერთად ზრდიან, ასევე არსებობენ ერთი სქესის მეგობრები ან 3-დან 6 წევრამდე მეგობართა წრეები, რომლებსაც ათწლეულების განმავლობაში ერთმანეთის გვერდიგვერდ დგომა ახასიათებთ. ფლამინგოები უმეგობრდებიან მხოლოდ მათ, ვისაც კარგად შეეწყობიან და თავს არიდებენ მათ, ვისთან კინკლაობაც გარდაუვალია. – ვირჯინია მორელი