გზავნილები მეცნიერებისა და ინოვაციის მოწინავე ხაზიდან

უჯრედული ბიოლოგია

უდრეკი ნელამავალნი: სიძლიერე მინიატურაში

ნელამავალებს მომრგვალებული სხეულის გამო წყლის დათვებსაც უწოდებენ. ეს ნესტის მოყვარული ბიოლოგიური საოცრებები გვალვის საფრთხეს გაუწყლოებით და მძინარე მდგომარეობით უმკლავდებიან. თავს წარმატებით იცავენ ძლიერი სიცხის, რენტგენის გამოსხივებისა და ღია კოსმოსის პირობებშიც. 2016 წელს მათი გამძლეობის მიზეზების კვლევისას, იაპონელმა მეცნიერებმა აღმოაჩინეს, რომ ნელამავალთა ერთი სახეობა განსაკუთრებული პროტეინით – Dsup-ითაა დაჯილდოებული, რომელიც მის დნმ-ს იცავს. სან-დიეგოში, კალიფორნიის უნივერსიტეტში, Dsup-ის არსებობა ნელამავალთა მეორე სახეობაშიც დაადასტურეს, რაც მათ ჯგუფში ამ ცილის საყოველთაო გავრცელებაზე მიანიშნებს. ამასთანავე, შეიტყვეს, რომ Dsup-ი ებმის დნმ-ის შემფუთავ „ძაფებს~ და ქმნის დამცავ ფარებს რეაქტიული და დამაზიანებელი ოქსიდანტების – ჰიდროქსილის რადიკალების წინააღმდეგ, რომლებსაც რადიაცია წარმოქმნის წყლის მოლეკულების დაშლისას. ეს აღმოჩენა ადამიანებს სამედიცინო კვლევების დროს უჯრედების კულტურების სხვადასხვა სტრეს-ფაქტორისგან დაცვაში შეიძლება დაეხმაროს. – მაიკლ გრეშკო

ბიოპლასტმასად ქცეული ავოკადოს კურკა

მექსიკური კომპანია Biofase-ის მიერ ავოკადოს კურკებისგან შექმნილმა ბიოპლასტმასამ შესაძლოა სამზარეულოს ინსტრუმენტებში გამოყენებული პლასტმასის 60% ჩაანაცვლოს. ავოკადოს ნაერთები სხვა ორგანული ნარჩენებივით იშლება. შესაბამისად, ნაგავსაყრელებზე ნაკლები პლასტმასა დაგროვდება. – დენიელ სტოუნი

ნეირომეცნიერება

რა შეიგრძნობს თქვენს ტკივილს?

საიდან მოდის ტკივილის განცდა, როდესაც ნემსით გჩხვლეტენ? აშკარა პასუხია: ნერვებიდან კანში, თუმცა, თაგვებზე ჩატარებული ახალი კვლევის მიხედვით, ტკივილის წყარო შეიძლება მანამდე უცნობი კანქვეშა ორგანო, სახელად ნოციცეფციური გლიონერვული კომპლექსი (მონიშნულია მწვანედ) იყოს. როდესაც გენური რედაქტირებით გლიური უჯრედები ითიშება, თაგვების ტკივილის აღქმა ქვეითდება. ჯერაც გამოსაკვლევია, თუ როგორ მუშაობს ეს ორგანო ადამიანებში და შესაძლებელია თუ არა მასზე ზემოქმედება ტკივილის შესამსუბუქებლად. – კეტრინ ცუკერმანი