გზავნილები მეცნიერებისა და ინოვაციის მოწინავე ხაზიდან

ვინ არის ეს დათვი?

ადამიანის სახის ამომცნობ სისტემებს ხშირად უსაფრთხოების სამსახურები და სამართალდამცავი ორგანოები იყენებენ. BearID-ის სახელით ცნობილმა გრიზლების სახეების ამომცნობმა სისტემამ შესაძლოა მკვლევრებს ამ ცხოველებზე ხანგრძლივად დაკვირვების შესაძლებლობა მისცეს. გრიზლების გარჩევა პრობლემას წარმოადგენს, რადგან მათი ერთმანეთისგან განმასხვავებელი ნიშნები ნაკლებად შესამჩნევია. ტექნოლოგია, რომელიც ეკოლოგების და კომპიუტერული მეცნიერებების სპეციალისტების თანამშრომლობით შეიქმნა, ფოტოხაფანგებით აღბეჭდილ დათვებს მარტივად ამოიცნობს. 83,9% სიზუსტით მომუშავე პროგრამა სიღრმისეული შესწავლის ალგორითმებით ავლენს და ინიშნავს გრიზლების სახის მახასიათებლებს. ბრიტანეთის კოლუმბიის ადგილობრივი მცხოვრებლები უკვე იყენებენ ამ პროგრამას კონკრეტული დათვების დიდ ტერიტორიებზე საკონტროლებლად. BearID-ის შემქმნელებს იმედი აქვთ, რომ თავიანთი გამოგონების სხვა სახეობებზე მორგებით შეძლებენ კარიბუებსა და თეთრ დათვებზე დაკვირვებას, რაც მეცნიერებს ამ ცხოველების შესწავლასა და დაცვაში დაეხმარება.

მინის დაფქვით ქვიშის მიღება

ქვიშისგან ბევრი რამ, მათ შორის ქიმიკატები და მინა მზადდება. მაღალი მოთხოვნის გამო ზოგიერთ სანაპიროს ქვიშა მოაკლდა. კომპანიამ, სახელად Export, შექმნა დანადგარები, რომლებიც მინის ბოთლებს წვრილ გრანულებად შლის. ქვიშის ასეთ შემცვლელს შემდგომ სხვადასხვა მრეწველობაში იყენებენ.

გენების ქურდი მწერი

ბევრი მცენარე თავდაცვის მიზნით გამოყოფს ტოქსინებს, რომლებიც პესტიციდივით მოქმედებს, თუმცა ამგვარი სტრატეგია უძლურია ფრთათეთრას (Bemisia tabaci) წინააღმდეგ, რადგან დაახლოებით 35 მილიონი წლის წინ მან ასეთი ტოქსინების გამანეიტრალებელი გენი შეიძინა. ჩინელმა მეცნიერებმა აღმოაჩინეს, რომ მწერმა ეს გენი, სავარაუდოდ, მაშინ “მოიპარა“, როდესაც ვირუსით დაავადებული მცენარე შეჭამა. ეს მცენარიდან ცხოველზე ფუნქციური გენის გადაცემის ერთ-ერთი პირველი ცნობილი შემთხვევაა.