გზავნილები მეცნიერებისა და ინოვაციის მოწინავე ხაზიდან

ცხოველები

კიბოს გენები ხელს უწყობს ირმების რქების ზრდას

კეთილშობილი ირმის რქები ორ კვირაში 20 სანტიმეტრზე მეტით შეიძლება გაიზარდოს და დაახლოებით 30 კილოგრამამდე იწონიდეს. უჯრედები, რომლებიც ამ შთამბეჭდავი გამონაზარდის ზრდას უწყობს ხელს, ერთ-ერთი ყველაზე სწრაფად გამრავლებადია ცხოველთა სამყაროში. ცოტა ხნის წინ, ჟურნალ Science-ში გამოქვეყნებული კვლევის თანახმად, მათ აქვთ გენები, რომლებიც გამოვლენილია სხვა სწრაფად დაყოფად უჯრედებშიც – სიმსივნის უჯრედებში. უფრო ზუსტად კი გენები, რომლებსაც ეს რქები იყენებს, ოსტეოსარკომის (ძვლის კიბოს) უჯრედების გენებს უფრო ჰგავს, ვიდრე ჯანმრთელი ძვლის ქსოვილისას. ამის მიუხედავად, ირმები, სხვა ძუძუმწოვრებთან შედარებით, ხუთჯერ ნაკლებად ავადდებიან კიბოთი – შეიძლება იმიტომ, რომ მათი რქის უჯრედებში ასევე კიბოს ძლიერი ჩამხშობი რამდენიმე გენი შედის. ირმების მიერ კიბოს უჯრედების თავიანთ სასარგებლოდ გამოყენების პროცესის კვლევა ექიმებს შეიძლება სხვა ცხოველებისა და ასევე ადამიანებისათვის ონკოლოგიური მკურნალობის მეთოდების პოვნაში დაეხმაროს. – დაგლას მეინი

კარგი ამბები ბაყაყებისთვის

SynFrog-ი ბაყაყების გაკვეთის ახალი, ჰუმანური ალტერნატივაა. ეს ხელოვნური სველი ქსოვილისგან დამზადებული ბაყაყია, რომელიც გარეგნულადაც და შეხებითაც ნამდვილს ჰგავს, თანაც, ბაყაყის შინაგანი ორგანოებისა და კვერცხების იმიტაციასაც კი ახდენს. SynFrog-ის გამოყენება მრავალჯერადად უსაფრთხოდ შეიძლება: ნამდვილი ბაყაყები შეიძლება ისეთი მომწამლავი ნივთიერებებით იყვნენ გაჟღენთილნი, როგორიც ფორმალდეჰიდია. – ნატაშა დეილი

ფოტო: SYNDAVER

პლანეტა თუ პლასტმასა?

შამპუნი ბოთლისაგან თავისუფლდება

დაამსხვრიეთ, დაამატეთ წყალი და შხაპში მათი მეშვეობით გაიქაფეთ – ამ მოსაზრებით აქციეს შამპუნი, თმის ბალზამი და შხაპის გელი კუბის ფორმის ნატეხებად. ეს პატრა კუბები ერთჯერადი გამოყენების პლასტმასის პატარა ბოთლებში მოთავსებული სამგზავრო კოსმეტიკის ალტერნატივაა, რომელთა გამოყენებაც კალიფორნიის შტატის სასტუმროებში 2023 წლიდან აიკრძალება. კუბიკების დამამზადებელი კომპანია EarthSuds-ის თქმით, სასტუმრო, რომელიც მომხმარებელს ამ კუბიკებს შესთავაზებს, წლიურად 13 600 კგ პლასტმასის ნარჩენს აირიდებს თავიდან. – სარა გიბენსი