რიცხვები:

40 – სალაშქრო ბილიკის სრულად გასავლელად საჭირო დღეების საშუალო რაოდენობა

52 – გზის გასწვრივ არსებული სოფლების რაოდენობა. მათგან ბევრი მასპინძლობს სტუმრებს

2300 – პეტრას დაახლოებითი ასაკი წლებში

იორდანიის 650 კილომეტრზე გადაჭიმული გზა უძველეს ქალაქ პეტრაზე (მისი მონასტერი ნაჩვენებია ფოტოზე), უდაბნოს დიუნებსა და კლდოვან ხეობაზე გადის. სავაჭრო გზებზე ოდესღაც მოსიარულე ნაბატეველებსა და რომაელებს თავგადასავლების მოყვარული მოგზაურები ჩაენაცვლნენ.

რას ნახავთ:
2017 წელს გახსნილი, ჩრდილოეთიდან სამხრეთისკენ მიმავალი მარშრუტის ბილიკი სოფელ უმ-ქაისში იღებს სათავეს და წითელი ზღვის ქალაქ ალ-აქაბაში სრულდება. იორდანიის მშრალი კლიმატის მიუხედავად, ლანდშაფტი მდიდარია ჩრდილოეთში ზეთისხილის ხეებით გამწვანებული ფერდობებით, სამხრეთში კი – წყალუხვი ნაპირებით. შუაში მდებარე უადი-რუმის ქვიშაქვის არაამქვეყნიურ ფორმაციებში (ფილმებში ხშირად მარსის ხედების შემცვლელი) შემორჩენილი ნაბატეველთა კულტურის წარწერები 2000 წელზე მეტს ითვლის.

აღმოაჩინე მეტი:
ბილიკზე: დედამიწის ხმელეთის ყველაზე დაბალ წერტილში, მკვდარ ზღვაში, მარილის სიჭარბის გამო, მხოლოდ მიკროორგანიზმები ბინადრობენ, მოცურავეები კი ძალდატანების გარეშე ტივტივებენ ზედაპირზე. მყვინთავებს ალ-აქაბას წყლების ფერადი მარჯნის რიფები იზიდავს.

ბილიკიდან გადახვევა: რომაული ქალაქის, ჯერაშის, იპოდრომზე ძველად ეტლებით რბოლა იმართებოდა ხოლმე. შაუმარის ნაკრძალში დამთვალიერებლები თვალს მოჰკრავენ იშვიათ ქვიშის ქურციკს და არაბულ ორიქსს.

როგორ მოვხვდეთ იქ:
ბილიკის საწყის წერტილში, უმ-ქაისში იორდანიის დედაქალაქ ამანიდან ავტობუსით, დაახლოებით, ორ საათში ჩააღწევთ. ზოგიერთი მოგზაური ბილიკს დამოუკიდებლად გადის, თუმცა იორდანიის სალაშქრო ბილიკების ასოციაცია ხელს უწყობს შაბათ-კვირას მოგზაურობებს, ოთხდღიან მარშრუტებს და ყოველწლიურ ჯგუფურ ექსპედიციებს. ღამის გათევას სოფლის სახლებსა ან ადგილობრივი ბედუინების მიერ მართულ ეკოკოტეჯებში შეძლებთ.