ისტორიული ლასტები

მარილიან წყალსა და მზეში ასობით საათით ყოფნისგან გაცვეთილ, პლასტმასისა და რეზინის ამ უბრალო ლასტებს მრავალი თავგადასავალი უნახავთ. ეს იმიტომ, რომ მათი მფლობელი ბარიერების გამრღვევი, რეკორდების დამამყარებელი ოკეანოგრაფი სილვია ერლია.

ერლი პირველი ქალი იყო, რომელმაც ბათისკაფით ჩაყვინთა; იგი სათავეში ედგა მხოლოდ ქალებისგან შემდგარ პირველ ჯგუფს, რომელმაც ორი კვირა იცხოვრა წყალქვეშ. 1979 წელს მან ოაჰუში ბაგირის გარეშე სიღრმეზე დაშვების რეკორდი დაამყარა. National Geographic-ის მკვლევარი ერლი აშშ-ის ოკეანეებისა და ატმოსფეროს ეროვნული ადმინისტრაციის პირველი ქალი მთავარი მეცნიერი გახდა.

ლასტების რამდენი წყვილი გაცვითა ერლმა კვლევების პერიოდში, არავის დაუთვლია. დღეისთვის იგი უპირატესობას ანიჭებს მაღალტექნოლოგიურ ლასტებს, რომლებსაც აშშ-ის სპეცრაზმები იყენებენ. თუმცა, სამხედროების ლასტები შავია, ერლისა კი – წითელი. იგი მათ „ლალისფერ ლასტებს“ უწოდებს.