კეთილი იყოს თქვენი მობრძანება თქვენს ახალ National Geographic-ში

ალბათ როგორც კი ჟურნალი National Geographic-ი გადაშალეთ, მაშინვე იგრძენით, რომ იგი შეიცვალა. შენიშნეთ განსხვავებული შრიფტით დაწერილი სტატიის სათაური ჟურნალის გარეკანზე? ეს ყველაზე თვალსაჩინოა მრავალი ცვლილებიდან, რომლებსაც მომავალში შემოგთავაზებთ იმისათვის, რათა უკეთ შეძლოთ, გაეცნოთ მსოფლიოს ყველაზე საინტერესო და შთამბეჭდავ ამბებს. ჟურნალი ინტელექტუალური მკითხველის სიყვარულით სარგებლობს მთელ დედამიწაზე; ამიტომაც გადავწყვიტეთ, 130 წლის იუბილე მისი გაუმჯობესებით აღგვენიშნა. გთხოვთ გვითხრათ, რას ფიქრობთ ცვლილებების შესახებ; ჩვენი ელ-ფოსტაა: [email protected].

ის, რაც შეიცვალა       

ახალი რუბრიკები დასაწყისში: ჟურნალის პირველ ნაწილში სამ სხვადასხვა, მოკლე რუბრიკას გთავაზობთ. თვალსაჩინო ფოტოების საშუალებით მოყოლილი ამბავია. გადავწყვიტეთ, იმით დაგვეწყო, რაც ამ ჟურნალს ყველაზე კარგად გამოსდის: ვიზუალური თხრობა. გარდატეხა აქტუალურ თემებს გამოეხმაურება – ამ თვეში მეცნიერებაში სექსუალური ძალადობის საკითხს. სამყარო კვლავ საინტერესო ამბებს მოგვითხრობს. ამ რუბრიკაში სიახლეა: „ატლასი“ – რუკების საშუალებით მოყოლილი ისტორია და „ობიექტივში“ – ცნობილი ფოტოკადრის ისტორია.

კიდევ უფრო მეტი აქცენტი ვიზუალურ თხრობაზე: ყოველ გამოცემაში ოთხი-ხუთი ერთი და იმავე მოცულობის სტატიის დაბეჭდვას მრავალფეროვნება ვარჩიეთ – მომავალში რამდენიმე შედარებით მოკლე, ილუსტრაციებითა და ფოტოებით გაჯერებულ და სამ ტრადიციული ზომის, ღრმა კვლევაზე დაფუძნებულ სტატიას შემოგთავაზებთ, რომლებიც ჩვენი  სამარკო ნიშანია. ამ ნომრის მთავარი თემაა საბჭოთა პერიოდში რეპრესირებული ხელოვანების ბედი, რომელთა სულის შემძვრელ ამბავს ეკა ქევანიშვილი და ირა კურმაევა მოგვითხრობენ.

თამამი დიზაინი და ახალი შრიფტი: ალბათ შენიშნავთ უფრო თანამედროვე დიზაინს ახალი სასათაურე შრიფტით, რომელიც საშუალებას გვაძლევს, უკეთ გამოვხატოთ სათაურებში სტატიის შინაარსი. განახლებული დიზაინის წყალობით, ვფიქრობთ, მოწოდებული მასალა ბევრად უფრო ადვილი აღსაქმელია თვალისთვის. იმისათვის კი, რომ უნიკალური ფოტოების თვალიერებაში ხელი არაფერმა შეგიშალოთ, ხშირად მთელ შლას გთავაზობთ ყოველგვარი წარწერის გარეშე.

ის, რაც უცვლელია

ჩვენი ძირითადი პრინციპი და ჟურნალის ფორმატი: არსებობს რამდენიმე დაუწერელი კანონი, რომელთაც არასოდეს ვარღვევთ – ეს ის მთავარი პრინციპებია, რაც ჟურნალ National Geographic-ს სხვებისგან გამოარჩევს. რა თქმა უნდა, არ შეგვიცვლია ჟურნალის ფორმატი და, რაც მთავარია, არ გვიღალატია და არასოდეს ვუღალატებთ იმ მთავარ პრინციპს, რომელიც ჩვენს ყველა ქმედებას უდევს საფუძვლად: ჩვენ ვართ მეცნიერების, ფაქტებისა და პლანეტის მხარეს. 

და, როგორც ყოველთვის, გმადლობთ, რომ კითხულობთ National Geographic საქართველოს.