მარადმწვანე კოლხური ბზა

დედამიწაზე არსებობს ადგილები, რომლებსაც რეფუგიუმებს უწოდებენ, ეს ის ადგილებია, სადაც სახეობა ან ცოცხალ არსებათა ჯგუფი გადარჩა არახელსაყრელ  გეოლოგიურ პერიოდში. ასე გადაურჩა 15 ათასი წლის წინანდელ გამყინვარებას კავკასიის რეფუგიუმში მარადმწვანე მცენარე – ბზა, რომელსაც გადარჩენის ადგილის მიხედვით, კოლხური ბზა (Buxus colchica) უწოდეს.

გასაკვირიც არაა, რომ ეს მარადმწვანე ხე ან ბუჩქი, რომელიც, დაახლოებით, 600 წელიწადი ცოცხლობს და უკანასკნელი 30-40 მილიონი წლის განმავლობაში მცირედ თუ შეიცვალა, ქართველებმა მარადიული სიცოცხლის სიმბოლოდ აირჩიეს და საქართველოში მართლმადიდებლები იერუსალიმად შესვლის აღსანიშნავად უხილავ ქრისტეს სწორედ ბზის ტოტებს უფენენ პალმის რტოების ნაცვლად.

ბზობის დღესასწაულზე საითაც უნდა გავიხედოთ, ბზას ვხედავთ, ის ყოველთვის არის და არის ძალიან ბევრი. ბზა თითქოს ჩვენი იდენტობის განუყოფელი ნაწილია და, შესაბამისად, როდესაც იგებ, რომ შეიძლება სულ მალე ის გადაშენდეს, დაჯერება გიჭირს.

დიახ, სამწუხაროდ, ეს სიმართლეა – კოლხური ბზა გადაშენების პირასაა. ამ ნომერში ჩვენ წარმოგიდგენთ სტატიას, რომელშიც შევეცადეთ, სიღრმისეულად მოგვეთხრო თქვენთვის ამ მცენარის შესახებ.

დღეს თითოეულ ჩვენგანზეა დამოკიდებული, გააგრძელებს თუ არა სიცოცხლეს კოლხური ბზა. National Geographic საქართველოს გუნდმა მისი სამი ნერგი „იშვილა“ და ზრდის იმ იმედით, რომ, როდესაც დრო მოვა, მას ბუნებაში დააბრუნებს – შემოგვიერთდით!

გილოცავთ დამდეგ ახალ წელს და გმადლობთ, რომ კითხულობთ National Geographic საქართველოს.