მეცნიერებისა და ინოვაციის მოწინავე ხაზიდან

ყბებით შერკინება

Neoclinus blanchardi-ს ყბის ძვლები საშუალებას აძლევს პირი ფართოდ გააღოს და ფსიქოდელიური ფერები დაგვანახოს. გაურკვეველი იყო, რატომ განუვითარდა აღნიშნულ სახეობას ამოდენა პირი: „შესაძლოა ისინი განსაკუთრებულ ფუნქციას ასრულებენ“, – ამბობს ბანგკოკის უნივერსიტეტის ბიოლოგი და National Geographic-ის მკვლევარი ვაჩარაპონგ ჰონგჯამრასილპი. მამრებს უფრო დიდი და ფერადი პირი აქვთ და მეცნიერთა ჯგუფი დაინტერესდა, ამას მდედრების მისაზიდად იყენებდნენ, თუ მამრებთან მეტოქეობისთვის ან საკომუნიკაციოდ. ამიტომ ჯგუფმა შეჯიბრი მოაწყო. აკვარიუმში ორი მამრის მოთავსებისას მხოლოდ ერთს შეეძლო ნიჟარის დაკავება. ნიჟარის ბინადარი მეორე თევზს ხშირად ხახას აჩვენებდა. მომხდური თევზი უკან იხევდა ან ბრძოლაში მსგავსი ფორმით ერთვებოდა; ბრძოლას ხშირად დიდი თევზი იგებდა. პირის გაღება მეწყვილის პოვნის მიზნით კვლევამ ვერ დაადასტურა. – კეროლინ უილკე

მყარი გადაწყვეტილება ნარჩენებისთვის 

გამოყენებული საკვები ზეთის ნიჟარაში გადაღვრა კარგი არ არის, რადგან საკანალიზაციო მილში ცხიმის საცობს წარმოქმნის. არსებობს „ზეთის გამამყარებელი“ მცენარეული ფხვნილები, რომლებიც ტაფის ქაფქაფა შიგთავსს შედედებულ, მყარ ფირფიტად აქცევს და მისი გადაგდება ორგანულ ნაგავთან ერთად შეგიძლიათ. – პატრისია ედმონდსი

ღამის პეპელა ღამურას ექოლოკაციას ახშობს?

1862 წელს, 30 სმ სიგრძის სანექტრეს მქონე მადაგასკარული ორქიდეის დანახვისას დარვინმა დაასკვნა, რომ შესაბამისი დამამტვერიანებელიც უნდა არსებობდეს. ოთხი ათწლეულის შემდეგ აღმოაჩინეს Xanthopan praedicta – ღამის პეპელა მწერებს შორის ყველაზე გრძელი ხორთუმით. National Geographic-ის მკვლევარმა ჯულიეტ რუბინმა კი სხვა ადაპტაციაც აღმოაჩინა: როდესაც

ტყვეობაში მყოფ ამ მამრ მწერებთან ღამურას ექოლოკაციის ხმებს რთავდნენ, ისინი გენიტალიების და მუცლის ხახუნით ულტრაბგერებს წარმოქმნიდნენ, რაც, სავარაუდოდ, ღამურას სონარს ახშობს. – პატრისია ედმონდსი