მისი უდიდებულესობის სქესობრივი ცხოვრება ჯანმრთელობის საწინდარია

კარგია დედოფლობა – ჭიანჭველების დედოფლის ჯანმრთელობაზე შეწყვილება სასწაულებს ახდენს.

ბაქტერიის ან ვირუსის მცირე დოზა მოგვიანებით ორგანიზმს უფრო რეზისტენტულს ხდის იმავე პათოგენის შედარებით დიდი დოზის მიმართ; პროცესს იმუნური სისტემის პრაიმინგსაც უწოდებენ. პრაიმინგის შესასწავლად შვეიცარიელმა და პანამელმა მკვლევრებმა ბაღის შავი (Lasius niger) და ფორმიცინების გვარის ჭიანჭველების (Formica selysi) დედოფლები შეარჩიეს. სახეობები ორ ჯგუფად იყო დაყოფილი – ქალწული „პრინცესები“ და შეწყვილებული მდედრები, რომლებიც სპერმათეკაში გადანახული ბიოლოგიური მასალით მილიონობით კვერცხს გაანაყოფიერებდნენ მთელი ცხოვრების განმავლობაში.

მკვლევრებმა გამოიყვანეს სოკო, რომელიც ველურ ბუნებაში მწერს დაახლოებით ერთ კვირაში კლავს. თავდაპირველად მცირე დოზით უშვებდნენ ორივე ჯგუფის დედოფლების ორგანიზმში, ერთ კვირაში კი დიდი დოზით. გადარჩენილთა რაოდენობამ ცხადყო, რომ მხოლოდ ბაღის შავი ჭიანჭველების შეწყვილებულმა დედოფლებმა გამოიმუშავებს იმუნიტეტი პრაიმინგის პროცესის შედეგად. თუმცა, სოკოს ზემოქმედებას არსებითად  უკეთ გაუძლეს ორივე სახეობის შეწყვილებულმა დედოფლებმა.

კვლევის შედეგად მიღებული მონაცემებით შეიძლება ითქვას, რომ მამრთან დაწყვილება იმუნური სისტემის აქტივაციას იწვევს. შეწყვილებამ იმუნურ სისტემაზე მნიშვნელოვნად და ხანგრძლივად იმოქმედა.  შესაბამისად, სქესობრივი აქტი დედოფალს სიცოცხლეს უხანგრძლივებს. – პატრისია ედმონდსი

ჰაბიტატი / არეალი
ბაღის შავი ჭიანჭველა (Lasius niger) ევროპაში, ჩრდილოეთ ამერიკასა და აზიაშია გავრცელებული. მათ ბაღებში, ტროტუარების ბზარებსა და სახლებშიც კი წააწყდებით.

სხვა ფაქტები
ჭიანჭველები ხშირად ბუგრების კოლონიის მახლობლად ცხოვრობენ და ანტენების მეშვეობით მათ მიერ გამოყოფილი ცვარტკბილით იკვებებიან. ბუგრები ახლოს რომ ჰყავდეთ, შეიძლება ფრთებიც მოაჭამონ; საკუთარ ბუგრის „ფარას“ ჭიანჭველები სხვა მტაცებლებისგანაც იცავენ.

ქათმები გაველურდნენ

ჰავაის კუნძულ კაუაიზე ათასობით იდუმალი წარმოშობის ველური ქათამი ცხოვრობს. საინტერესოა, ისინი პოლინეზიელების მიერ რამდენიმე ათასი წლის წინ ჰავაიზე ჩამოყვანილი წითელი ბანკივური ქათმებისგან წარმოიშვნენ თუ მოშინაურებული ფრინველისგან? ებენ გერინგის ბიოლოგიური ტესტის შედეგად დადგინდა, რომ ორივე მათგანისგან. მისი თქმით, ამ გარეული ფრინველების შინაურ ქათმებთან შეჯვარებით, ფერმის ახალ, გენეტიკურად ძლიერ სახეობას მივიღებთ. – რეიჩელ ჰარტიგან შეი