მათთვის, ვინც ბანგლადეშის გარეთ ცხოვრობს, კოქს-ბაზარი ლტოლვილთა ყველაზე დიდი ბანაკია მსოფლიოში. აქ მილიონამდე როჰინჯამ დაიდო ბინა მეზობელ მიანმაში მომხდარი კონფლიქტისთვის თავის დასაღწევად, რომელიც ამერიკის შეერთებულმა შტატებმა გენოციდად გამოაცხადა. თუმცა, ბანგლადეშში მცხოვრებთათვის ეს ყველაზე საყვარელი დასასვენებელი ადგილია, ასევე მსოფლიოში ყველაზე გრძელი, ბუნებრივი ქვიშის სანაპირო, რომელიც ბენგალის ყურის 95 კილომეტრზე არის გადაჭიმული.

`არსებითად განსხვავებულ „ორ სამყაროს“ –  ლტოლვილთა ბანაკსა და პლაჟს, მთაგრეხილი და გამშვები პუნქტები ყოფენ ერთმანეთისგან“, – ამბობს ადგილობრივი დოკუმენტალისტი ფოტოგრაფი ისმაილ ფერდოუსი, რომელიც ორივე მხარეს კარგად იცნობს და ბოლო დროს იქ როჰინჯების კრიზისს აშუქებდა.

2020 წლის დასაწყისში, ზამთრის ერთ დღეს, ფერდოუსმა გადაწყვიტა პლაჟზე გაესეირნა. ტემპერატურა 38 გრადუსს აღწევდა, სანაპირო კი ხალხით იყო სავსე. ბევრ მათგანს 10- ან 15-საათიანი გზა ჰქონდა გამოვლილი ღამით იმისათვის, რომ შუადღე წყალში გაეტარებინა.

მინაწერის გახსნა

გააზიარეთ ფოტო

მინაწერის გახსნა

ფერდოუსი დედაქალაქში – დაკაში გაიზარდა. იგი 10 წლის განმავლობაში საზღვარგარეთ ცხოვრობდა და როდესაც კოქს-ბაზარში დაბრუნდა, ძლიერი კულტურული შოკი მიიღო. მის წინ გადაშლილი სურათი მკვეთრად განსხვავდებოდა ევროპისა და ამერიკის პლაჟებისგან. შუადღის კაშკაშა მზეზე იგი იღებდა სეირნობისთვის გასაქირავებელ ცხენებს და მოკრძალებულ საცურაო კოსტიუმებში გამოწყობილ მოცურავეებს.

ფერდოუსი ამ ადგილს კიდევ ორჯერ დაუბრუნდა, თებერვალში კი თავისი მშობლები, დები, ძმა და დისშვილებიც ჩაიყვანა ხანგრძლივ არდადეგებზე. 20 წელიწადზე მეტი იქნებოდა გასული მას შემდეგ, რაც ოჯახი ამ ადგილებს ბოლოს ერთად სტუმრობდა. „დედა დღესაც მწერს და მადლობას მიხდის ამისთვის“, – ამბობს ფერდოუსი. 

The National Geographic Society, რომელიც ჩვენი სამყაროს საოცრებათა გაშუქებასა და დაცვაზე ზრუნავს, 2019 წლიდან აფინანსებს მკვლევარ ისმაილ ფერდოუსის საქმიანობას.

ილუსტრაცია: ჯო მაკკენდრი 

ნინა სტროქლიკი National Geographic-ის შტატიანი ავტორია. მისი უკანასკნელი ვრცელი სტატია ვია-აპიას შესახებ გვიამბობს. ისმაილ ფერდოუსი სოციალურ და ჰუმანიტარულ მოვლენებს აშუქებს.