პოლიეთილენისგან მშვენიერი ბუდე გამოდის

იტალიის ალპებში ხეების კენწეროებზე მოფრიალე თეთრმა პარკებმა ფაბრიციო სერჯიო დააინტერესა. იტალიელმა ეკოლოგმა იცოდა, რომ ნაგავი ერთი კონკრეტული ფრინველის – ძერის ბუდეებიდან მოჩანდა, მაგრამ რატომ?

ფრინველების ბუდეების შემადგენლობის შესწავლისას სერჯო და სხვა მეცნიერები ცივილიზაციის ზეგავლენის ნიშნებს ეძებენ. ზოგიერთმა ფრინველმა ბუნებრივი მასალების ნაცვლად საიზოლაციო მასალების, ფოლგისა და სიგარეტის ნამწვების გამოყენება დაიწყო, რაც, შესაძლებელია, მათი საცხოვრებლიდან ბუნებრივი საშენი მასალების გაქრობაზე მიუთითებს.

ექვსწლიანი კვლევის შედეგად დადგინდა, რომ ძერები „მოდურ” საშენ მასალას მაღალი სოციალური სტატუსის საჩვენებლად იყენებენ. ყველაზე მეტი პოლიეთილენის პარკის შემცველი ბუდეები ყველაზე ძლიერ ფრინველებს ეკუთვნოდა, რომლებსაც დეკორატიული საშენი მასალის დაპატრონების მსურველთა მოგერიება შეეძლოთ. უბრალო ბუდეები ახალგაზრდა ან ბებერი ფრინველებისა იყო, რომლებიც ბუდეებს ასეთი თავდასხმებისაგან ვერ იცავდნენ.