პომპეის ანარეკლი საფრანგეთში

საფრანგეთში, არლში, 2000 წელზე უფრო მეტი ხნის სასახლეში აღმოჩენილმა რომაულმა ფრესკებმა არქეოლოგები გააოგნა. მოხატული თაბაშირის ფრაგმენტები საძინებელსა და მისაღებ დარბაზშია შემორჩენილი. გათხრილი მიწიდან მოხერხდა კედლებიდან ჩამოცვენილი ფრაგმენტების გამორჩევა და აღდგენაც. ქალი, რომელსაც სიმებიანი ინსტრუმენტი უჭირავს ხელში, სავარაუდოდ, მითოსური პერსონაჟია; მსგავსი ნამუშევრები საფრანგეთისთვის უჩვეულოა.

ნახატები ძვირფასი პიგმენტებით დამზადებული საღებავითაა შესრულებული; ამიტომ ექს-პერტებს მიაჩნიათ, რომ მხატვარი რომაელი იყო, რომელიც ქალაქის ელიტის წარმომადგენელმა დაიქირავა. შესაძლოა, რომაელი ვეტერანი ლეგიონერებისთვის ძვ. წ. 46 წელს დაარსებულ კოლონიურ სავაჭრო პორტში გადმოსახლებულ რომაელს ეს პომპეისთვის დამახასიათებელი დეკორაცია მშობლიურ სახლს ახსენებდა ან სულაც რომელიმე მდიდარი დახვეწილი გემოვნების წარმოჩენას ცდილობდა.