14 წელი გავიდა მას შემდეგ, რაც დენ ბიუტნერმა ჩვენი ჟურნალისთვის მსოფლიოს უხუცეს ადამიანებზე დაწერა სტატია. იგი დღემდე მოგზაურობს რეგიონებში, რომელთაც ლურჯ ზონებს უწოდებს და ხანგრძლივი ცხოვრების საიდუმლოს იკვლევს. ბიუტნერი მსოფლიოს სხვადასხვა კუთხეში ტრადიციულ რეცეპტებს აგროვებს და ცდილობს გაარკვიოს, როგორ გვიხანგრძლივებს ზოგიერთი საკვები სიცოცხლეს.

როდესაც მსოფლიოს გარშემო ვმოგზაურობდი და ასწლოვანთა ოაზისებს ვეძებდი, მრავალი ლურჯი ზონა აღმოვაჩინე: კუნძული სარდინია, ნიკოიის ნახევარკუნძული, საბერძნეთის კუნძული იკარია, იაპონიის კუნძული ოკინავა და მეშვიდე დღის ადვენტისტების დასახლება სამხრეთ კალიფორნიაში.

გადავწყვიტე, ლურჯი ზონების საკვები რაციონი შემესწავლა, გამერკვია, როგორ იკვებებოდა ამ რეგიონებში მცხოვრები ხალხი ადრე და როგორ იკვებება ახლა. XX საუკუნის ბოლომდე მათი რაციონი მინიმალურად დამუშავებული მცენარეული საკვებისგან შედგებოდა: ცეხვილი მარცვლეულის, ბოსტნეულის, თხილეულის, გორგლიანების და პარკოსნებისგან. ხალხი ხორცს იშვიათად ჭამდა, თვეში საშუალოდ ხუთჯერ. სასმელად ძირითადად წყალს, ბალახეულ ჩაის, ყავას და ღვინოს იყენებდნენ. ძროხის რძეს იშვიათად ან საერთოდ არ სვამდნენ. გაზიან სასმელებზე წარმოდგენა არ ჰქონდათ. გლობალიზაციასთან ერთად დამუშავებულმა საკვებმა, ცხოველურმა პროდუქტებმა და სწრაფი კვების კერძებმა ნელ-ნელა ჩაანაცვლა მცენარეული საკვები. გასაკვირი არ არის, რომ კვების ცვლილებასთან ერთად ლურჯ ზონებში ქრონიკული დაავადებების რიცხვმა იმატა.

ჯანსაღი კვება ხანგრძლივი ცხოვრების მხოლოდ ერთ-ერთი ფაქტორია. აი, ზოგიერთი სხვაც: ახლო მეგობრების წრე, საკუთარი დანიშნულების შეგრძნება, გარემო, რომელიც მუდმივი მოძრაობისკენ გიბიძგებს და ყოველდღიური რიტუალები, რომლებიც სტრესის დაძლევაში გეხმარება.

კალორიების უმეტესობას ლურჯ ზონებში მცხოვრები ხალხი მცენარეული საკვებისგან იღებს. მარცვლეული, ბოსტნეული, თხილეული, პარკოსნები – აი ოთხი სვეტი, რომელსაც ხანგრძლივი სიცოცხლე ეყრდნობა.

იმ ადამიანების ნახევარზე მეტი წელს ამერიკაში გულ-სისხლძარღვთა დაავადებით, სიმსივნით, ან დიაბეტით გარდაიცვლება. ლურჯ ზონებში ეს დაავადებები იშვიათად ემართებათ. რატომ? – იმიტომ, რომ ეს ხალხი იმას ჭამს, რაზეც ხელი იოლად მიუწვდება და, საბედნიეროდ, ეს მცენარეული საკვებია. იქნებ სწორედ აქ იმალება ჯანმრთელი და ხანგრძლივი ცხოვრების საიდუმლო? თუ მცენარეული დიეტის დასაწყებად გემრიელი კერძის რეცეპტს ეძებთ, ერთ ას წელს გადაცილებულ ენერგიულ ქალბატონს ვიცნობ, შესანიშნავ მინესტრონეს რომ აკეთებს.

სრული ვერსია წაიკითხეთ იანვრის ნომერში.